बोदवड (प्रतिनिधी) येथील अनियंत्रित वाहतूक व्यवस्थेमुळे एका वृद्धाचा ट्रक खाली चिरडून मृत्यू झाल्याची दुर्दैवी घटना आज सकाळी साडेनऊच्या दरम्यान घडली. गंगाराम जगदेव पाटील (वय ८५, रा. मोठा मारुती मंदिराजवळ बोदवड), असे मयत वृद्धाचे नाव आहे. दरम्यान, पोलिसांनी ट्रक जप्त करत चालकाला ताब्यात घेतले आहे.
गंगाराम पाटील हे काही कामानिमित्त मलकापूर रस्त्याने जात असतांना वळणावर त्यांना ट्रक (एम.एच ४६ बी.एफ ६१३२) चा जोरदार धक्का लागला व ते खाली पडले. खाली पडल्यानंतर ते ट्रकचे पुढच्या चाकाखाली आल्याने गंगाराम पाटील यांच्या डोक्याचा चेंदामेंदा होऊन त्यांचा जागीच मृत्यू झाला. मयत गंगाराम पाटील हे राष्ट्रसंत तुकडोजी महाराजांचे अनुयायी होते. तुकडोजी महाराजांचा प्रत्यक्ष सहवासात ते काही काळ होते. या वयातही ते बोदवड येथील तुकडोजी आश्रमात सेवा देत असत. तालुक्यात चिरपरिचित गंगाराम पाटील यांच्या अपघाती मृत्यूनंतर बोदवड शहरात शोककळा पसरली. त्यांच्या पश्चात पत्नी दोन मुले दोन मुली नातवंडे असा परिवार आहे.
आजच्या या सुन्न करणाऱ्या अपघातामुळे पुन्हा एकदा बोदवड येथील रस्तावाहतुकीचा प्रश्न चर्चेत आला आहे. गावातून जाणारा हा प्रमुख मार्ग आहे जामनेर, भुसावळ कडून येणारी वाहने याच ठिकाणाहून मलकापूर मुक्ताईनगर कडे जातात. सतत वर्दळीच्या या रस्त्याचे आधीच रस्ते विकास महामंडळाचे अपूर्ण काम ,तसेच अतिक्रमण,दुकांनासमोर उभ्या राहणाऱ्या कालिपिली, मालवाहतूक गाड्या, हातगाड्या यांची गर्दी तसेच बेशिस्त मोटारसायकल उभ्या करणे या सर्व गोष्टीमुळे या रहदारीच्या रस्त्यावर नेहमीच वाहतूक कोंडी होत असते. त्यामुळे या भागातून वाहन चालवणे हे धोकादायक झाले आहे.
पायी चालणाऱ्यांसाठी तर हा रस्ता अत्यंत धोकादायक व अपघातप्रवण आहे. याठिकाणी नेहमीच छोटे अपघात होतात. मात्र, लोक त्यापासून काही बोध कुणीही घेत नाहीत. मोठ्या वाहन धारकांनातर फार सावधपणे वाहने चालवावी लागतात. आज इतका मोठा अपघात होऊनसुद्धा त्या भागातुन वाहतूक सुरळीत होईल अशी व्यवस्था केलेली दिसत नव्हती. या अपघातास कारणीभूत ट्रकचा चालक अब्दुल वहिद खान (रा गोवंडी मुंबई) याच्याविरुद्ध बोदवड पोलीस ठाण्यात गुन्हा दाखल झाला असून पोलिसांनी ट्रक जप्त केला आहे.
