नागपूर (वृत्तसंस्था) भद्रावती तालुक्यातील बेलगाव येथील एका युवा शेतमजुराचा फवारणी पंप चार्जिंगला लावताना वीजेचा धक्का लागून मृत्यू झाल्याची घटना रविवारी रात्री घडली. स्वप्निल सुभाष रासेकर (२६) असे मृतकाचे नाव आहे.
मृतक स्वप्निल हा विनोद ठेंगणे यांच्या बेलगाव येथील शेतात शेतमजूर होता. मागील काही वर्षांपासून तो ठेंगणे यांच्याकडे कामाला आहे. दरम्यान, रविवारी तो फवारणी पंप चार्जिंगला लावत असताना वीजेचा धक्का लागला. यातच त्याचा मृत्यू झाला. दरम्यान, शेतमालक ठेंगणे यांनी लगेच ग्रामीण रुग्णालयात उपचारासाठी आणले. परंतु, डॉक्टरांनी त्याला मृत घोषित केले. घटनेची माहिती भद्रावती पोलिसांना मिळाल्यानंतर त्यांनी घटनास्थळी भेट देत पंचनामा करून आकस्मिक मृत्यूची नोंद केली.
शवविच्छेदनासाठी स्वप्निल रासेकर याचा मृतदेह भद्रावती येथील ग्रामीण रुग्णालयात दाखल करण्यात आला. मृतदेहाचे शवविच्छेदन झाल्यानंतर त्याच्या नातलगांनी जोपर्यंत आर्थिक मदत मिळणार नाही. तोपर्यंत मृतदेह न घेतल्याने काही काळ रुग्णालय परिसरात तणावाचे वातावरण निर्माण झाले होते. त्यानंतर शेतमालकाने आर्थिक मदत देऊ केल्यानंतर हे प्रकरण निवळले.
