जळगाव (प्रतिनिधी) येथील निमखेडी शिवारात असलेल्या कांताई नेत्रालयजवळ भरदिवसा मुख्य रस्त्यावर दोन मुलांनी क्षुल्लक कारणावरून आपल्या बापाचा खून केल्याचा प्रकार उघडकीस आला आहे. या प्रकारामुळे परिसरात मोठी खळबळ उडाली आहे.
पोलिसांकडून मिळालेल्या माहितीनुसार, प्रेमसिंग अभिसींग राठोड (वय ५०) असे मृताचे नाव आहे. निमखेडी शिवारात कांताई नेत्रालयाजवळ प्रेमसिंग राठोड हे पत्नी, दोन मुले, दोन मुली यांच्यासह वास्तव्याला होते. ते काही दिवसांपासून आजारी असल्याने आज सकाळी त्यांना त्यांची मुले दीपक आणि गोपाळ यांनी दवाखान्यात जाण्याचे सुचविले. मात्र प्रेमसिंग यांनी याला नकार दिला. यावर घरात वाद झाला. या वादातूनच प्रेमसिंग यांनी चाकू उगारून आपल्या मुलांना धमकावले. याप्रसंगी झालेल्या झटापटीत दोन्ही मुलांनी त्याच चाकूने वडिलांवर वार करून त्यांना संपविले.
दरम्यान, तालुका पोलिस स्थानकाच्या कर्मचाऱ्यांनी घटनास्थळी धाव घेऊन दीपक आणि गोपाळ या दोन्ही मुलांना ताब्यात घेतले आहे. तर घटनास्थळी अपर पोलीस अधिक्षक चंद्रकांत गवळी व सहायक पोलीस अधिक्षक कुमार चिंथा यांनी भेट दिली.
