अहमदनगर : भरधाव कंटेनर आणि दुचाकींच्या अपघातात चार जण ठार तर एक जण जखमी झाल्याची घटना अहमदनगर -छत्रपती संभाजीनगर महामार्गावर पांढरीपूल येथे घडली. रविवारी संध्याकाळच्या सुमारास ही दुर्घटना घडली. हृद्यद्रावक म्हणजे मृतांमध्ये आई-वडिलांसह दोन भावंडांचा समावेश आहे. अनिल बाळासाहेब पवार (वय 20), सोनाली अनिल पवार (वय22), माउली अनिल पवार आणि एक सहा महिन्यांची मुलगी (सर्व रा. वडगाव सावताळ, टाकळी ढोकेश्वर, ता. पारनेर) अशी दुचाकीवरील मृतांची नावे आहेत.
याबाबत सविस्तर माहिती अशी कि, इमामपूर घाटाच्या तीव्र उतारावरून छत्रपती संभाजी नगरकडे जाणाऱ्या कंटेनरने (क्र.एच.आर. ३८ ए.सी. ५८४८) पुढे चाललेल्या दोन दुचाकींना पाठीमागून चिरडले. हा अपघात सायंकाळी चार वाजण्याच्या सुमारास झाला. मोपेड दुचाकी (क्र. एम.एच.१६ सी.बी. ५२०३) तसेच दुसरी दुचाकी (क्र. एम एच.१६ ए.व्ही. १९३१) या गाड्यांना पाठीमागुन जोराची धडक देण्यात आल्याने भीषण अपघात घडला. त्यामध्ये एकाच दुचाकीवरील चार जणांचा मृत्यू झाला आहे. तर दुसऱ्या दुचाकीवरील भगवान आव्हाड (रा. पांगरमल ता.नगर) हे जखमी झाले आहेत. अपघातानंतर कंटेनर चालक फरार झाला.
दुचाकीवरील अनिल पवार, सोनाली पवार, माऊली पवार व एक सहा महिन्यांची मुलगी यांचा मृत्यू, झाला आहे. घटनास्थळी एमआयडीसी पोलीस स्टेशनचे पोलीस हवालदार मोहम्मद शेख, भगवान वंजारी, ज्ञानेश्वर तांदळे यांनी भेट देऊन वाहतूक सुरळीत केली. दरम्यान पांढरीपुल परिसरात दररोज होणाऱ्या अपघातांना आळा घालण्यासाठी ग्रामस्थांनी आक्रमक होत आंदोलनाचा इशारा दिला होता. शुक्रवार दि.२६ रोजी येथे झालेल्या अपघातात सहाजण जखमी झाल्याची घटना घडली होती. त्यावेळी ही स्थानिक नागरिकांनी तीव्र संताप व्यक्त केला होता. परंतु येथील अपघात टाळण्यासाठी प्रशासनाकडून काहीच पाऊले उचलली जात नाहीत. त्यामुळे पांढरीपूल पंचक्रोशीतील ग्रामस्थांमधून संताप व्यक्त करण्यात येत आहे.
