चोपडा येथे मध्यरात्री भीषण अग्नितांडव ; तरुणाचा होरपळून मृत्यू !

चोपडा (लतीश जैन) येथील मेन रोडवरील राहुल एम्पोरियम या दुकानाला रात्री साधारण एक वाजेच्या सुमारास अचानक लागलेल्या आगीत गौरव सुरेश राखेचा (वय 30) या तरुणाचा होरपळून मृत्यू झाला. तर या भीषण अग्नीतांडवात लाखोंचा ऐवज जाळून खाक झालाय.

मध्यरात्री आग लागल्याचे घरातील झोपलेल्या लोकांना कळाले नाही. आग तिसऱ्या मजल्यावरून दुसऱ्या मजल्यावर आल्यानंतर प्रचंड खळबळ उडाली. या आगीतून सुरेश राखेचा व कविता राखीचा यांना घरातून निघण्यात यश आले. यात कविता राखेचा या जखमी झाल्या आहेत. परंतु वरच्या मजल्यावर गौरव राखेचा आणि त्याची पत्नी मोना राखेचा, संकेत राखेचा, शुभम राखेचा व लहान बाळ गौरव असे चारही जण वरच्या रूममध्ये अडकून होते. नगरपालिकेचे कर्मचारी व स्थानिक लोकांनी सर्वात अगोदर शुभम राखेचा यांना बाहेर काढण्यात यश मिळवले. त्यानंतर संकेत राखेचा, मोना राखेचा व लहान बाळाला काढण्यात यश आले. परंतू संकेत वरती अडकून आहे, या विचाराने गौरव राखेचा आपल्या पत्नीला सोडून परत वरती गेला. पण तोपर्यंत आगीने रौद्ररूप धारण केले होते. भेदरलेला गौरव तिसऱ्या मजल्यावर बाथरूममध्ये लपून बसला. परंतू आग मोठ्या प्रमाणात असल्यामुळे गौरवचा बाथरूममध्ये गुदमरूम मृत्यू झाला.

यावेळी गल्लीबोळातील नागरिकांनी अथक परिश्रम करून सर्वांना सुखरूप काढण्यासाठी प्रयत्न केले. परंतु आगीत अखेर गौरवचा मृत्यू झाला. आगीत नगरपालिका कर्मचारी बडगुजर हे देखील जखमी झाले आहेत. घराचे व दुकानाचे पूर्ण साहित्य जळून खाक झाले. दरम्यान, एवढे मोठे अग्नितांडव अशी घटना चोपडा शहरात पहिल्यांदाच झाली, असावा असा कायास बांधला जात आहे. आगीच्या वेळेस एपीआय अजित साबळे व त्यांचे कर्मचारी यांनी देखील मेहनत घेतली. चोपडा पीपल बँक चेअरमन चंद्रासभाई गुजराती, संचालक जैन, राजूभाऊ बिटवा, अजय भाऊ राजपूत, सागर ने,वे मयंक जैन, निर्मल बोरा आदींनीही मदत केली. तर यावल, धरणगाव, पारोळा, शिरपूर, अमळनेर व जळगांव येथून अग्निशमन दलाच्या गाड्या मागवण्यात आल्या होत्या.

शहर पोलीस स्टेशनचे  प्रभारी अजित सावळे, पोहेकॉं. जितेंद्र सोनवणे, पोना. मधुकर पवार, नितिन कापडणे, शुभम पाटील, हेमंत कोळी, हर्षल पाटील आदिंसह इतर पोलीस कर्मचारी यांनी तातडीने बचावकार्य राबविले. त्याबरोबरच चोपडा नगरपरिषद अग्निशमन दलासह यावल, धरणगाव, पारोळा, शिरपूर, अमळनेर व जळगांव येथील दलांनी आग विझविण्यासाठी महत्वाची भुमिका बजावली. यावेळी चोपडा शहर पोलीसांच्या सतर्कतेमुळे मोठा अनर्थ टळला. शहरवासियांनी सुद्धा यावेळी धाव घेत बचावकार्यात मदत केली. शिवसेना तालुकाप्रमुख राजेंद्र पाटील, प्रविण जैन, पत्रकार लतीष जैन, सचिन सोनवणे, चेतन कानडे, सौरभ नेवे, अमर बोहरा, शिवा पाटील आदिंसह इतर शहरवासियांनी बचावकार्यात मदत केली.