जळगाव (प्रतिनिधी) शॉर्ट सर्कीटमुळे चंद्रीका सॉ मिलसह तेथेच असलेल्या महादेव प्लायवुड अॅण्ड डोअर कंपनी या दरवाजे बनविण्याच्या कारखान्याला आग लागली. ही घटना शहरातील बेंडाळे चौकात गुरुवारी दुपारी १२ वाजेच्या सुमारास घडली. या आगीत सॉ मिलसह, फर्निचर दुकान पुर्णपणे जळून खाक झाली असून लाखो रुपयाचे नुकसान झाल्याचा अंदाज वतर्विला जात आहे. भर पावसात लागलेल्या आगीमुळे अग्निशमन विभागाच्या १५ बंबांनी साडेतीन तासात ही आग आटोक्यात आणली.
शहरातील नेरीनाका चौक ते बेंडाळे चौक दरम्यान हरिलाल पटेल यांच्या मालकीची चंद्रीका सॉ मिल आहे. त्याच मिलच्या परिसरात त्यांचे बंधू गंगाराम पटेल यांचे महादेव प्लायवुड अॅण्ड डोअर कंपनी नावाने दरवाजे बनविण्याचा कारखान्यासह फर्निचर विक्रीचे दुकान आहे. याच फर्नीचरच्या दुकानाला गुरुवारी दुपारी १२ वाजेच्या सुमारास अचानक शॉर्टसर्कीटमुळे आग लागली. या दुकानात संपूर्ण लाकडाच्या वस्तू असल्याने आगीने काही वेळातच रौद्ररूप धारण केले. सुरुवातीला कामगारांसह परिसरातील नागरिकांनी आग विझविण्याचा प्रयत्न केला. मात्र आग वाढत असल्याने, महानगरपालिकेचे अग्निशमन दलाचे बंब तातडीने घटनास्थळी दाखल झाले.
लाखो रुपयांचे साहित्य जळून खाक
शहरात सकाळपासूनच जोरदार पाऊस सुरू असतानाही वखारीला आग लागली. आगीची तीव्रता वाढतच असल्यामुळे आगीने रौद्ररुप धारण केले होते. भरपावसात मनपाच्या अग्निशमन विभागाकडून आग आटोक्यात आणण्याचे प्रयत्न सुरु होते. या आगीत सॉ मिल मधील लाकडांसह प्लायवुडच्या दुकानातील साहित्य दरवाजे पुर्णपणे जळून खाक झाले असून सुमारे लाखो रुपयांचा नुकसान झाल्याचा अंदाज पोलिसांकडून वर्तविला जात होता.
साडेतीन तासानंतर आगीवर नियंत्रण
भर पावसात आग वाढतच असल्याने जळगावच्या तीन बंबांसह भुसावळ, जामनेर व जैन इरिगेशन कंपनीचा बंबाद्वारे आगीवर नियंत्रण मिळविण्याचे प्रयत्न केले जात होते. सुमारे १५ बंबांचा वापर करुन साडेतीन तासानंतर आगीवर नियंत्रण मिळविण्यात आले. सुदैवाने, या दुर्घटनेत कोणतीही जीवितहानी झाली नाही. जवळच लाकडाचे एक मोठे गोडाऊन होते, जिथे आग पसरली असती तर मोठे नुकसान झाले असते.
