जून्या वादातून शहरातील तांबापुरा परिसरात रात्रीच्या सुमारास शाहिद शहा सद्दाम शहा (वय १९, रा. टिपू सुलतान चौक, तांबापूरा) या तरुणाच्या गळ्यावर धारदार शस्त्राने वार केले. यामध्ये तो तरुण गंभीर जखमी झाला असून त्याला ४५ टक्यांची शस्त्रक्रिया करण्यात आली. दरम्यान, वार करणाऱ्या संशयिताला एमआयडीसी पोलिसांनी अटक केली असून त्याच्याविरुद्ध गुन्हा दाखल करण्यात आला आहे.
शहरातील तांबापुरा टिपु सुलतान चौक येथे शाहिद शहा सद्दाम शहा हा तरुण आई-वडील कुटूंबीयांसह वास्तव्यास आहे. त्याच परिसरात राहणारा फारुख शेख याच्या सोबत शाहिद याचा वाद होवुन भांडण झाले होते. त्याचा राग फारुखच्या डोक्यात होता. मंगळवारी रात्री शाहिद शहा त्याचा मित्र, इरफान युनूस शेख, नाझीम याच्या सोबत फिरदोस डेअरी समोरील चौकात उभा असतांना फारुख शेख सलीम हा तेथे आला व माझ्या नादी लागला तर, तुला जिवंत ठेवणार नाही असे म्हणत, खिश्यातून धारदार शस्त्र काढून त्याने शाहिदच्या गळ्यावर वार केला.
रक्तबंबाळ अवस्थेत केले रुग्णालयात दाखल
अचानक झालेल्या हल्ल्यामुळे शाहीद हा रक्ताच्या थारोळ्यात जमीनीवर कोसळला. त्याला तात्काळ रिक्षातून जिल्हा रुग्णालयात दाखल केले. त्याच्यावर उपचार करण्यात येवुन तो बुधवारी शुद्धीवर आला असून त्याचा जबाब घेतल्यावर एमआयडीसी पोलिस ठाण्यात प्राणघातक हल्ल्याचा गुन्हा दाखल करण्यात आला आहे.
बगिच्यात लपून बसलेल्या संशयिताला अटक
शाहीदच्या गळ्यावर वार केल्यानंतर त्याला गंभीर दुखापत झाली. रुग्णालयात त्याच्यावर ४५ टाक्यांची शस्त्रक्रिया करण्यात आली. वार केल्यानंतर संशयित फारुख शेख हा पसार झाला होता. तो मेहरुणच्या बगिच्यात लपून बसल्याची माहिती मिळाल्यानंत पोलीस निरीक्षक बबन आव्हाड यांच्या मार्गदर्शनाखाली नाना तायडे, नितीन ठाकूर, ठाकूर, किरण पाटील व राहूल घेटे यांच्या पथकाने संशयित संशयित शेख फारुख शेख सलीम उर्फ सोनू (रा. तांबापूर) याला अटक केली.
