अमळनेर (प्रतिनिधी) अंतरपाट धरणाऱ्या मामाशिवाय लग्न होऊ शकत नाही. भाच्याना विवाहात गुंतवण्यात मामाचा मोठा वाटा असतो. मात्र भाचीचा विवाह सोडून एका डॉक्टरने महिलेवर गुंतागुंतीची शस्त्रक्रिया करून तिचे प्राण वाचवले.
डॉ. दिनेश महाजन आणि डॉ. अश्विनी महाजन यांच्या भाचीचे लग्न होते. काही क्षणात लग्न लागणार होते. धार्मिक कर्तव्य म्हणून मामा अंतरपाट धरायला जाणार तोच पैलाडमधील एका ३८ वर्षीय महिलेच्या पोटात दुखू लागले. मोरया हॉस्पिटलमध्ये दाखल केले. तेथून त्यांनी डॉ. दिनेश महाजन याना कॉल केला. महिलेची प्रकृती गंभीर होती. भाचीचे लग्न सोडून डॉ महाजन दाम्पत्य दवाखान्यात हजर झाले. डॉ. अश्विनी महाजन यांनी महिलेची तपासणी केली असता महिलेच्या शरीरात केवळ तीन एचबी रक्त होते. सोनोग्राफी केली असता त्या महिलेच्या पोटातील गर्भनलिकेतला गर्भ फुटला होता आणि पोटात रक्त जमा झाले होते. त्यामुळे महिला मरणाच्या दारात उभी होती. तिला धुळ्याला रवाना केले तर रस्त्यात तिचा मृत्यू होऊ शकत होता. महिलेची अत्यंत गुंतागुंतीची परिस्थिती पाहता लागलीच त्यांनी शस्त्रक्रिया करण्याचे ठरविले. भूलतज्ज्ञ डॉ. प्रसाद छेडे यांना पाचारण करून शस्त्रक्रिया करून पोटातील साचलेले साडे चार लिटर रक्त व रक्ताचे गोळे बाहेर काढले व पाच रक्ताच्या पिशव्या लावून रुग्णाचे प्राण वाचवले. महिलेला जीवदान दिल्यानंतर सायंकाळी चार वाजता आपल्या भाचीच्या लग्नाला पोहचले. शेवटच्या पंगतीत जेवायला बसले.
