चिनावल ता. रावेर (प्रतिनिधी) येथील ‘एटीएम’मध्ये ठराविक रक्कमेचा आकडा टाकल्यावर चक्क त्या रक्कमेच्या पाच पट रकम निघत होती. त्यामुळे एसटी स्टैंड परिसरातील ‘इंडीकॅशच्या एटीएम केंद्रावर सायंकाळी तोबा गर्दी पाहायला मिळाली. अडीच तासात सुमारे सहा लाखांची रक्कम काढली गेल्याचा अंदाज वर्तवण्यात येत आहे.
यासंदर्भात अधिक असे की, चिनावल येथील एसटी स्टैंड परिसरातील ‘इंडीकॅशच्या एटीएम केंद्रावर एटीएममध्ये ५०० रुपये व त्याच्या पटीत रक्कम टाकल्यास चक्क पाच पट रक्कम निघत होती. सायंकाळी सहा ते रात्री साडेआठपर्यंत अडीच तासात सुमारे सहा लाखांची रक्कम काढली गेल्याचा अंदाज वर्तवण्यात येत आहे. रात्री नऊला एका कर्मचाऱ्यांला याबाबतची माहिती मिळाली. त्यांनी तत्काळ सावदा पोलिसांना कळवले. ए.टी.एम असलेल्या गर्दीवर नियंत्रण मिळवले व एटीएम लॉक केले.
