चोपडा (प्रतिनिधी) तालुक्यातील मोहरद गावी जवळपास दहा महिन्यापासून ग्रामसेवक हजर नसल्याने ग्रामस्थांना मोठ्या अडचणींचा सामना करावा लागत आहे. मागील दहा महिन्यापासून आजपर्यंत एकही ग्रामसभा, मासिक सभा झाली नसल्याचे मोहरद येथील ग्रामपंचायतचे उपसरपंच हभीब बुरहान तडवी, अमजत सुजात तडवी (ग्रामपंचायत सदस्य,) सुरलाल बारेला (ग्रामपंचायत सदस्य,) यांनी पंचायत समिती आवारात पत्रकारांशी संवाद साधताना सांगितले.
यावेळी ग्रामपंचायत सदस्यांनी सांगितले की, मागील दहा महिन्यात पंचायत समितीचे बिडिओ भरत कासोदे यांच्याकडे तोंडीं व लेखी तक्रार देऊनही आमच्या गावाकडे मुद्द्यांम दुर्लक्ष केले जात आहे. तसेच ग्रामस्थांना खोटे ठरवून बिडिओ हे मुद्दाम दुर्लक्ष करीत आहेत. ग्रामसेवक सोबत आज बिडिओ यांना ग्रामस्थांनी घेरले असता बिडिओने ग्रामसेवकाला उद्या कामावर हजर व्हा, असे सांगितले. परंतु ग्रामसेवक वासुदेव रामसिंग पारधीकडे चार्ज असताना खंडेराव पाटील यांना चार्ज दिला, असे पारधी यांनी सांगितले. परंतु पारधी यांनी चार्ज मला सोपवलेलाच नाही, असं बिडिओ कासोदे समोर सांगितले. यावेळी बिडिओ समोर मोहरद येथील ग्रामपंचायत सदस्य व ग्रामस्थ हजर होते.
बिडिओ कासोदेकर यांना पत्रकार भेटायला गेले असता त्यांनी पत्रकारांना उडवा उडवीचे उत्तर दिले. तसेच ग्रामसेवक दहा महिन्यापासून येत नसल्याचे पत्रकारांनी विचारले असता कासोदेकर म्हटले की, मोहरद ग्रामस्थ खोटं बोलत आहेत. नंतर पत्रकारांनी उमर्टि गावाच्या भ्रष्टाचारा संदर्भात प्रश्न विचारले असता कासोदेकरांनी काही पत्रकारांना तुम्ही बातमी टाकली ना?… असं उत्तर देऊन टाळाटाळ केली. त्यावर पत्रकारांनी बातमी टाकली याचा अर्थ समोरील भ्रष्टाचार संपला का? असा प्रश्न विचारताच कासोदेकरांनी सारवा सावर करून मी असं कुठे बोललो?, असे म्हणत वेळ मारून नेली. आपण ग्रामसेवकाला पाठीशी घालता आहेत का?, असं पत्रकारांनी परत विचारले असता मी ग्रामसेवकाला का पाठीशी घालू?, असे उत्तर कासोदेकर यांनी दिले.
बीडीओ यांच्या उत्तरांनी मोहरद ग्रामस्थांचे समाधान झाले नाही. बिडिओ यांना भेटल्यावरही उद्या ग्रामसेवक येईल याची शाश्वती आम्हाला वाटत नाही. मागील दहा महिन्यापासून ह्याच बिडिओ साहेबांनी अनेक वेळा सांगितले की, मी ग्रामसेवकाला पाठवतो. तुम्ही तक्रार कुठेही करू नका, पत्रकारांशी बोलू नका, असेही सांगितले. यावेळी मोहरद ग्रामपंचायत सदस्यांनी सांगितले की, उद्यापासून जर मोहरद गावाला कायमस्वरूपी ग्रामसेवक आले नाही, तर आम्ही दोन दिवसाच्या आत सीईओ व जिल्हा अधिकारी कार्यालयाकडे तक्रार करणार आहोत.
ग्रामसेवक वासुदेव रामसिंग पारधी यांना बोलते केले असता यांनी सांगितले की, माझ्याकडे तीन गावाचे चार्ज आहेत. त्यामुळे आठवड्यातून मी एक दिवस मोहरद गावी जात असतो व आठवडा भरायचे काम करून घेत असतो. परंतु त्यांच्यासमोर मोहरद गावाचे उपसरपंच व सदस्य यांनी सांगितले की दहा महिन्यापासून तुम्ही गावात कुठे व कधी आलात सांगा?. हबीब बुरहान तडवी, यांनी सांगितले की, ग्रामसेवक हे जग जाहीर खोटं बोलत आहे. यावर ग्रामसेवकाने काढता पाय घेतला. याबाबत चौकशी न झाल्यास उद्रेक होईल असे ही मोहरद ग्रामपंचायत सदस्य, उपसरपंच यांनी सांगितले. तरी जिल्हाधिकारी अमन मित्तल यांनी जातीने लक्ष देऊन चोपडा पंचायत समितीची चौकशी लावावी, अशी मागणी सर्वत्र होत आहे.
