चाळीसगाव (प्रतिनिधी) एनडीएमधून प्रशिक्षण पूर्ण केल्यानंतर पुढील ४० दिवसात भारतीय सेनेत लेफ्टनंट कर्नल पदावर डेहराडून येथे रुजू होणाऱ्या तरुणाचे बॉक्सिंग खेळात डोक्यात मार लागल्याने निधन झाले. प्रथमेश गोरख महाले असे या तरुणाचे नाव आहे.
प्रथमेशचे वडील गोरख महाले आणि आई शीतल महाले हे पिंपळनेर (ता. साकरी) येथे शिक्षक म्हणून कार्यरत आहे. सध्या प्रथमेश हा स्क्वेंड्रॉन कॅडेट कॅप्टन (एससीसी) या पदावर कार्यरत होता. प्रथमेशने एनडीएमधून प्रशिक्षण पूर्ण केल्यानंतर येत्या ४० दिवसात भारतीय सेनेत लेफ्टनंट कर्नल पदावर रुजू होणार होता. पण, खडकवासला येथे प्रशिक्षणादरम्यान बॉक्सिंग या खेळात डोक्याला मार लागला व त्याला पुणे कमांड हॉस्पिटलला नेण्यात आले होते. पण, शर्थीचे प्रयत्न करूनही पहाटे ४ वाजता त्याचे निधन झाले. गुरुवारी सकाळी ९ वाजता प्रथमेशवर सायगाव येथे अंत्यसंस्कार करण्यात येणार असल्याचे सूत्रांनी सांगितले.
सायगाव येथील भरत महादू महाले यांचे पुतणे व गोरख महादू महाले यांचा मुलगा चि. प्रथम महाले याची काही दिवसांपूर्वीच राष्ट्रीय संरक्षण प्रबोधिनी (पुणे) येथे उच्च शिक्षणासाठी निवड झाली होती. प्रशिक्षण सुरू असतानाच त्याचे अकस्मात निधन झाल्याची घटना मनाला चटका लावणारी आहे. संरक्षण दलात सेवा देण्यासाठी सज्ज होणारा एक सुपुत्र आपल्या चाळीसगाव तालुक्याने गमावला आहे. समस्त महाले परिवाराच्या व सायगावकरांच्या दुःखात सहभागी असल्याच्या संवेदना आमदार मंगेश चव्हाण यांनी सोशल मीडियातून व्यक्त केल्या आहेत.
