जळगाव (प्रतिनिधी) – बाहेरगावी गेलेल्या मुकुंदा प्रताप शिरसाठ (वय ३७, रा. सिद्धीविनायक नगर) यांच्या बंद घराचा कडीकोयंडा तोडून चोरट्यांनी आत प्रवेश केला. त्यानंतर कपाटात ठेवलेले ४५ हजार रुपयांची रोकड लंपास केली. ही घटना दि. २३ मे ते दि. २६ मे दरम्यान घडली. याप्रकरणी तालुका पोलिसात अज्ञात चोरट्यांविरुद्ध गुन्हा दाखल करण्यात आला आहे.
शहरातील सिद्धीविनायक नगरात राहणारे मुकुंदा शिरसाठ हे शिक्षक आहेत. दि. २३ मे रोजी ते घराला कुलूप लावून कुटुंबियांसह बाहेरगावी गेले होते. यावेळी त्यांचे घर बंद असल्याची संधी साधत चोरट्यांनी त्यांच्या घराचा कडीकोयंडा तोडून घरात प्रवेश केला. त्यानंतर घरातील बेडरुमधील लोखंडी कपाटात ठेवलेली ४५ हजारांची रोकड लंपास केली. दरम्यान, दि. २६ मे रोजी शिरसाठ हे घरी परतल्यानंतर त्यांना घरात चोरी झाल्याचे समजले. त्यांनी लागलीच तालुका पोलिसात तक्रार दिली. त्यानुसार अज्ञात चोरट्यांविरुद्ध गुन्हा दाखल केला आहे. तपास पोहेकॉ श्रीकांत बदर हे करीत आहे.
