
वाशी : अनैतिक प्रेमसंबंधात अडसर ठरणाऱ्या पतीचा पत्नीने तिच्या प्रियकराच्या मदतीने निर्घृण खून केल्याची खळबळजनक घटना भूम तालुक्यातील रामकुंड शिवारात वाकवड तलावाजवळ गुरुवारी दुपारी घडली. या प्रकरणी वाशी पोलिसांनी पत्नी आणि तिच्या मावस दिराला ताब्यात घेतले आहे. गोविंद शिवाजी कागदे (वय २७, रा. गोलेगाव) असे मृत तरुणाचे नाव आहे.
गोविंद कागदे याचा विवाह सहा महिन्यांपूर्वी तांदूळवाडी (ता. वाशी) येथील बाळासाहेब चौधरी यांच्या कन्या अंजली हिच्याशी झाला होता. मात्र, विवाहापूर्वीच अंजलीचे तिच्या आत्याचा मुलगा शुभम सुभाष खोसे (वय २६) याच्यासोबत प्रेमसंबंध होते. दोघांना विवाह करायचा होता; परंतु अंजलीच्या वडिलांनी तिच्या इच्छेविरुद्ध गोविंदसोबत विवाह लावून दिला. लग्नानंतरही अंजली आणि शुभम यांच्यातील प्रेमसंबंध कायम होते. गोविंद हा त्यांच्या संबंधात अडसर ठरत असल्याने दोघांनी त्याचा खून करण्याचा कट रचल्याचे समोर आले आहे.
ठरलेल्या कटानुसार गुरुवारी गोविंदला फोन करून कुंथलगिरी घाटाजवळील रामकुंड शिवारातील वाकवड तलावाच्या परिसरात डोंगराळ भागात बोलावण्यात आले. तेथे त्याला दारू पाजण्यात आली. त्यानंतर वाद झाल्याने अंजली आणि शुभम यांनी गोविंदवर चाकूने वार केले. त्यानंतर दगडाने डोके ठेचून त्याचा खून केल्याची माहिती समोर आली आहे.
गुराख्याने ऐकला ओरडण्याचा आवाज, पोलिसांना दिली माहिती
घटनास्थळी गोविंदच्या ओरडण्याचा आवाज एका गुराख्याने ऐकला. दोघेजण मिळून एका व्यक्तीला मारहाण करत असल्याचे त्याने पाहिले. त्यानंतर गुराख्याने वाकवड येथील मारकड नामक व्यक्तीला फोन करून घटनेची माहिती दिली. मारकड यांनी तातडीने पोलिसांना कळवले. माहिती मिळताच वाशी पोलीस ठाण्याचे निरीक्षक शंकर शिंदे हे पोलिस कर्मचाऱ्यांसह घटनास्थळी दाखल झाले. या प्रकरणी पोलिसांनी पत्नी अंजली कागदे आणि शुभम खोसे यांना ताब्यात घेतले असून पुढील तपास सुरू आहे.
















