जळगाव, (प्रतिनिधी) : हंगाम २०२५-२०२६ साठी हरभरा (चणा) किमान आधारभूत खरेदी योजनेअंतर्गत हमीभाव रुपये ५ हजार ८७५ प्रति क्विंटल निश्चित करण्यात आला असून, या योजनेचा लाभ घेण्यासाठी ऑनलाइन नोंदणी करणे शेतकऱ्यांसाठी अनिवार्य आहे. जळगाव तालुक्यातील शेतकऱ्यांसाठी ही नोंदणी सुविधा जळगाव शहरातील विसनजी नगर येथील होमगार्ड ऑफिस शेजारी असलेल्या जळगाव जिल्हा कृषी औद्योगिक सर्व सेवा सहकारी संस्थेत उपलब्ध करून देण्यात आली आहे.
नोंदणीसाठी शेतकऱ्यांनी स्वतः हजेरी लावून लाइव्ह फोटो व थंबप्रिंट देणे आवश्यक आहे.1 मार्च पासून प्रत्यक्ष नोंदणी प्रक्रियेला सुरुवात झाली असून, ऑनलाइन नोंदणीची अंतिम मुदत ३१ मार्च २०२६ पर्यंत राहील. माल मोजणी झाल्यानंतर देखील शेतकऱ्यांनी थंबप्रिंटसाठी प्रत्यक्ष उपस्थित राहणे बंधनकारक आहे.
या किमान आधारभूत खरेदी योजनेचा लाभ जास्तीत जास्त शेतकऱ्यांनी घ्यावा, तसेच जळगाव तालुक्यातील सर्व पात्र शेतकरी बांधवांनी वेळेत ऑनलाइन नोंदणी पूर्ण करावी, असे आवाहन संस्थेचे चेअरमन आणि संचालक मंडळ यांनी केले आहे. अशी माहिती जळगाव जिल्हा कृषी औद्योगिक सर्व सेवा सहकारी संस्थेचे व्यवस्थापक व्ही. पी. पाटील यांनी प्रसिद्धीपत्रकाद्वारे दिली आहे.
नोंदणीसाठी आवश्यक कागदपत्रे
चालू रब्बी हंगाम २०२५-२०२६ चा हरभरा पिकपेरा नोंद असलेला ७/१२ उतारा.खाते उतारा (नमुना क्र. ८).आधारकार्डाची छायांकित प्रत.आधार लिंक असलेल्या सक्रिय बँक खात्याची पासबुकची छायांकित प्रत किंवा रद्द धनादेशाची छायांकित प्रत.शेतकऱ्यांचा मोबाईल क्रमांक.
आपला विश्वासू,(व्ही. पी. पाटील)
व्यवस्थापक,
जळगाव जिल्हा कृषी औद्योगिक सर्व सेवा सहकारी संस्था मर्यादित,
विसनजी नगर, जळगाव – ४२५ ००१.
संपर्क : 0257229650
