चाळीसगाव (प्रतिनिधी) खरजई रस्त्याने येणाऱ्या भरधाव मालवाहू पिकअप वाहनाने दुचाकीस्वाराला कट मारून महावितरण कंपनीच्या खांबाला जबर धडक दिली. जमावाने या वाहनाच्या चालकाला चोप दिला. घटनास्थळी पोहचल्यावर पोलिसांनी वाहनाची तपासणी केल्यावर मात्र, त्यांना धक्काच बसला. कारण या वाहनात तब्बल ११ लाख ३२ हजार ९०४ रूपयांचा गुटखा मिळून आला.
शहर पोलिस ठाण्याचे पोलिस निरीक्षक संदीप पाटील यांना १४ रोजी रात्री ८.४० वाजेच्या सुमारास माहिती मिळाली की, खरजई रस्त्याने येणाऱ्या एका महिंद्रा पिकअप मालवाहू वाहनाने खरजई रोड वरील रेल्वेगेट येथे एका दुचाकीस्वाराला कट मारून महावितरणच्या वीज खांबाला धडक दिली. त्यामुळे जमावाने वाहन चालकास चोप देत वाहनाची तोडफोड केली.
पोलिसांनी घटनास्थळी धाव घेतली असता वाहनचालक रेल्वे गेटजवळ जखमी अवस्थेत पडलेला होता. त्यानंतर वाहनाची तपासणी केली असता त्यात ११ लाख ३२ हजार ९०४ रूपयांचा गुटखा आढळून आला, पोलिसांनी गुटखा व टेम्पो असा १८ लाखांचा मुद्देमाल जप्त केला असून या प्रकरणी अमोल भोसले यांच्या फिर्यादीवरून चालक अक्षय गुलाब कोतकर याच्यावर गुन्हा नोंद करण्यात आला आहे.
