भुसावळ (प्रतिनिधी) इंदौरहून भुसावळकडे निघालेल्या कंटेनरमधून पोलिसांनी सुमारे 50 लाख रुपये किंमतीचा प्रतिबंधीत गुटखा जप्त केला असून इंदौरच्या कंटेनर चालकाला बेड्या ठोकल्या आहेत. विशेष म्हणजे कंटेनर चालकाला इंदौरहून हा गुटखा कुठे न्यायचा हेदेखील माहित नसल्याने आलेल्या कॉल्सद्वारे चालक हा भुसावळपर्यंत दाखल झाल्याची माहिती सूत्रांनी दिली. त्यामुळे गुटखा माफियांना शोधण्याचे व मूळ मालकांपर्यंत पोहोचण्याचे आव्हान यंत्रणेपुढे उभे ठाकले आहेत. पोलिसांनी 50 लाखांचा गुटखा व 10 लाखांचा कंटेनर जप्त करीत याप्रकरणी बाजारपेठ पोलिसात सोमवारी रात्री उशिरा गुन्हा दाखल केल्याने गुटखा तस्करांमध्ये खळबळ उडाली आहे.
कारवाईने गुटखा तस्कर हादरले !
इंदौरहून भुसावळकडे निघालेला कंटेनर (क्रमांक यु.पी.78 सी.एन.5698) मधून गुटख्याची तस्करी होणार असल्याची माहिती मिळाल्यानंतर पोलिसांनी जामनेर रोडवरील नाहाटा चौफुलीजवळ रविवारी रात्री साडेसात वाजेच्या सुमारास कंटेनर पकडला. कंटेनर चालक जगदीश श्रीवास्तव (48, इंदौर) यास ताब्यात घेतल्यानंतर त्याने केवळ भुसावळपर्यंत संबंधित आपल्याला फोनद्वारे माहिती देत असल्याचे सांगितल्याने नेमका हा गुटखा कुठे पोहोचवयाचा होता? याची माहिती समोर कळू शकली नाही मात्र ज्या क्रमांकाद्वारे चालकाशी संपर्क साधण्यात आला त्या क्रमांकाचा शोध घेवून मूळ गुटखा तस्करांना पकडण्याचे आव्हान आता यंत्रणेपुढे उभे राहिले आहे.
अन्न सुरक्षा विभागाने फिरवली पाठ !
रविवारी सायंकाळी गुटख्याचा कंटेनर पकडल्यानंतर अन्न व सुरक्षा विभागाला कारवाईबाबत पोलिसांनी पत्र दिल्यानंतर संबंधित विभागाचे अधिकारी सोमवारी दिवसभरात फिरकले नसल्याने आश्चर्य करण्यात आले तर अखेर शासकीय पंच घेवून पोलिसांनीच याप्रकरणी सोमवारी रात्री उशिरापर्यंत पंचनामा उरकत याप्रकरणी स्वतःच फिर्याद दाखल केली. सुमारे 46 लाख रुपयांचा गुटखा व दहा लाखांचा कंटेनर जप्त करण्यात आला.
यांनी केली कारवाई !
ही कारवाई पोलीस उपअधीक्षक कृष्णात पिंगळे, बाजारपेठ पोलीस निरीक्षक बबन आव्हाड यांच्या मार्गदर्शनाखाली सहाय्यक निरीक्षक हरीष भोये, पोलीस उपनिरीक्षक मंगेश जाधव, डीबी पथकातील सुनील जोशी, निलेश चौधरी, हेमा पानपाटील, रमण सुरळकर, प्रशांत परदेशी, योगेश माळी, प्रशांत सोनार, यासीन पिंजारी आदींच्या पथकाने केली.
