मुंबई (वृत्तसंस्था) मागील काही दिवसांपासून राज्यात मुंबई क्रुझ ड्रग्ज प्रकरणावरून जोरदार गोंधळ सुरू झाल्याचं पाहायला मिळत आहे. या प्रकरणात चर्चेच्या केंद्रस्थानी असलेले एनसीबीचे अधिकारी समीर वानखेडे यांची पत्नी क्रांती रेडकर यांनी एक खळबळजनक दावा केला आहे. काही दिवसांपूर्वी तीन जणांनी आमच्या घराची रेकी केली आहे आणि घराबाहेरील सीसीटीव्ही फुटेज आम्ही पोलिसांना देणार आहोत, असं त्यांनी म्हटलं आहे.
मुंबई क्रूझ ड्रग्ज प्रकरणाला आता वेगळं वळण लागलं आहे. या कारवाई प्रकरणी राज्याचे अल्पसंख्याक मंत्री नवाब मलिक दररोज समीर वानखेडे यांच्यावर नवे आरोप करत आहेत. त्यानंतर आरोप-प्रत्यारोपांच्या सत्रामुळे समीर वानखेडे यांच्या अडचणीत वाढ झाली आहे. काही दिवसांपूर्वी आमच्या घराजवळ तीन जण आले होते. त्या तिघांनी आमच्या घराची रेकी केली. या संदर्भातले सीसीटीव्ही फुटेज देखील आम्ही मिळवलं असल्याचे क्रांती रेडकर म्हणाल्या. आता ते सीसीटीव्ही फुटेज पोलिसांना देणार असल्याचंही त्या म्हणाल्या.
वानखेडे कुटुंबीय रामदास आठवलेंच्या भेटीला
समीर वानखेडे यांच्या पत्नी क्रांती रेडकर आणि वडील ज्ञानदेव वानखेडे यांनी केंद्रीय सामाजिक न्याय राज्यमंत्री रामदास आठवले यांची भेट घेतली. यावेळी रामदास आठवलेंनी समीर वानखेडे यांच्या कुटुंबीयांना आपलं समर्थन असल्याचं सांगत नवाब मलिक हे वानखेडे कुटुंबाची बदनामी करत असल्याचं म्हटलं आहे.
नवाब मलिक वानखेडे कुटुंबीयांची बदनामी करतायेत – रामदास आठवले
रामदास आठवले यांनी पत्रकार परिषद घेत म्हटलं, नवाब मलिक हे समीर वानखेडे आणि त्यांच्या कुटुंबीयांची बदनामी करत आहेत. वानखेडे कुटुंबीय मुस्लीम नाहीयेत. त्यांनी सर्व कागदपत्रे मला दाखवली आहेत. समीर वानखेडे यांच्यावर खोटे आरोप करण्यात येत आहेत. नवाब मलिक हे एनसीपी प्रवक्ते पदाचा गैरवापर करत आहेत. नवाब मलिक यांच्या जावयाला तरूगांत टाकले म्हणून ते हे सर्व करत आहेत असंही रामदास आठवले यांनी म्हटलं आहे.
