भुसावळ (प्रतिनिधी) शहादा तालुक्यातील काथरदे खुर्द येथील मूळ रहिवाशी व सध्या भुसावळ येथील रहिवाशी त्रिकय महिरे (वय ०१ वर्ष ०५ महिने) याने कमी वयातील भारतीय बालक म्हणून १ मिनिट ३७ सेकंदात जास्तीत जास्त मानवी शरीराचे अवयव ओळखण्याचा जागतिक विक्रम आपल्या नावावर नोंदविला आहे व त्याची दखल वर्ल्ड वाईड बुक ऑफ रेकॉर्डसमध्ये घेण्यात आली आहे.
त्रिकय हा नाहाटा महाविद्यालयातील प्रा. डॉ. विलास नाना महिरे व प्रज्ञा पवार-महिरे यांचा सुपुत्र आहे. त्याच्या या यशाचे कौतुक केंद्रीय मंत्री नितीनजी गडकरी यांच्या शुभहस्ते त्याला मेडल व प्रमाणपत्र देऊन गौरविण्यात आले. या कार्यक्रम प्रसंगी बदलापूर नगरपरिषदेचे माजी नगराध्यक्ष राम पातकर व त्याचे आजोबा सिद्धार्थ पवार (वरिष्ठ लिपिक, बदलापूर नगरपरिषद) उपस्थित होते. त्याच्या यशस्वीते मागे त्याचे आई-वडील, मामा प्रा. प्रशांत पवार आणि कुटूंबातील नातेवाईकांचे मार्गदर्शन लाभले. चि. त्रिकय हा नंदुरबार येथील नाना महिरे आणि माजी प्राचार्य अशोक पवार यांचा नातू आहे.
