पुणे (वृत्तसंस्था) भाजपचे प्रदेशाध्यक्ष चंद्रकांत पाटील यांनी शिवसेना खासदार संजय राऊतांना प्रत्युत्तर दिले आहे. ‘मी कोल्हापूर जिल्ह्यातील एका गावचा पाटील आहे. संजय राऊत यांच्यापेक्षा भयानक भाषेत मी बोलू शकतो. पण त्यांना कळेल म्हणून तशी भाषा वापरणे ही माझी संस्कृती नाही,’ अशा शब्दांत चंद्रकांत पाटील यांनी राऊतांना प्रत्युत्तर दिले आहे. ते आज पुण्यात पत्रकारांशी बोलत होते.
‘समोरच्याला जी भाषा कळते, त्या भाषेत मी बोलतो, असं सांगत संजय राऊत यांनी अलीकडे वापरलेल्या भाषेचं समर्थन केलं आहे. त्याबाबत विचारलं असता पाटील यांनी वरील उत्तर दिलं. तेलंगणचे मुख्यमंत्री मुंबईत आले व महाराष्ट्राच्या मुख्यमंत्र्यांना भेटून भाजपविरोधी प्रादेशिक पक्षांची आघाडी तयार करण्याची चर्चा केली. त्याबाबत विचारलेल्या प्रश्नावरही पाटील यांनी उत्तर दिलं. ‘२०१९ च्या लोकसभा निवडणुकीपूर्वी अशीच बिगरभाजप पक्षांनी महाआघाडीत बनवली होती व आता भाजपाला बहुमत मिळणार नाही अशी हवा निर्माण केली होती. तरीही त्या निवडणुकीत पंतप्रधान नरेंद्र मोदी यांच्या नेतृत्वात भाजपच्या जागा वाढून पक्षाला ३०३ जागांसह पूर्ण बहुमत मिळाले. २०२४ लोकसभा निवडणुकीत भाजपच्या जागा आणखी वाढतील. पण भाजपाविरोधी पक्षांनी आशा ठेवायला आणि प्रयत्न करायला हरकत नाही. शिवसेनेला गोव्याच्या गेल्या विधानसभा निवडणुकीत सगळे उमेदवार मिळून एकूण ७४३ मतं मिळाली होती, तरीही यावेळी त्यांनी सरकार स्थापनेचा दावा केला आहे, असा चिमटाही त्यांनी काढला.
‘उद्धव ठाकरे हे आमचे मित्र आहेत. एकतर्फी का असेना आमची मैत्री आहे. शिवसेनाप्रमुख बाळासाहेब ठाकरे यांचे चिरंजीव आहेत. अनेक वर्षे आम्ही एकत्र काम केलं आहे. संजय राऊत हे कालपरवा आलेले आहेत. त्यांनी आम्हाला शिकवू नये. ते शरद पवारांच्या अजेंड्यावर काम करताहेत हे उद्धव ठाकरे यांनी समजून घ्यावं, इतकंच आमचं मत आहे. मी कोणाला सल्ला देण्याइतका मोठा नाही. संजय राऊतांना मी कुठलाही सल्ला दिलेला नाही. त्यांना सल्ला देण्याचं धाडस परमेश्वरही करणार नाही,’ असं पाटील म्हणाले.
