जळगाव (प्रतिनिधी) नाशिक आयजींच्या विशेष पथकाने गोपनीय माहितीच्या आधारे 10 लाखांचा गुटखा जप्त केल्यामुळे खळबळ उडाली आहे. या प्रकरणी दोघांविरोधात गुन्हा दाखल करण्यात आला असून एकाला अटक करण्यात आली आहे. भगवान साहेबराव पाटील (रा.आव्हाणे, ता.धरणगाव) असे अटकेतील गुटखा मालकाचे नाव आहे.
नाशिक आयजींच्या विशेष पथकाने आरोग्यास अपायकारक अन्न पदार्थ असलेला रजनीगंधा पान मसाला, आरएमडी पान मसाला, राजनिवास पानमसाला, विमल पान मसाला, व्हिवन तंबाखू, जाफरानी जर्दा व एम.सेंटेड तंबाखूचा साठा एमआयडीसी पोलिस स्थानकाच्या हद्दीतील गुरुदेव नगर परीसरातील रॉयल इनफील्ड शोरूम पाठीमागच्या एका गोदामातून जप्त केला.
नाशिक आयजींच्या विशेष पथकाने ही कारवाई शुक्रवार, 10 रोजी 4.50 वाजेच्या सुमारास केली. याप्रकरणी रवी पाडवी यांच्या फिर्यादीवरून भगवान साहेबराव पाटील (30, आव्हाणे, ता.धरणगाव) व अरुण पाटील (जळगाव) यांच्याविरोधात गुन्हा दाखल करण्यात आला. गोदामातून नऊ लाख 91 हजार 600 रुपये किंमतीचा गुटखा, 23 हजारांची रोकड व दोन वाहने मिळून 19 लाख 14 हजार 600 रुपयांचा मुद्देमाल जप्त करण्यात आला. तपास पोलिस निरीक्षक रंगनाथ धारबडे करीत आहेत.
