शिरपूर (प्रतिनिधी) शहरातील करवंद नाका परिसरातील एका कॅफेत शिरपूर शहर पोलिसांनी अचानक धाड टाकली. या कॅफेत तरुण-तरुणींना ताब्यात घेण्यात आले. त्यानंतर समज देवून सोडून देण्यात आले. याप्रकरणी कॅफे मालकावर शिरपूर शहर पोलीस ठाण्यात गुन्हा दाखल करण्यात आला आहे.
शिरपूर शहरातील करवंद नाका परिसरातील सॉलीड कॅफेत अधिक पैसे आकारुन तरुण-तरुणींना जागा उपलब्ध करुन देत आक्षेपार्ह व असभ्य कृत्य करण्याची मुभा दिली जाते, अशी तक्रार नागरिकांनी पोलिसांकडे केली होती. त्याअनुषंगाने पोलीस निरीक्षक ए. एस. आगरकर यांच्या मार्गदर्शनाखाली पोलीस उपनिरीक्षक छाया पाटील, पोकॉ गांगुर्डे, महिला पोना पाटील, महिला पोका खैरनार, पावरा यांच्या पथकाने काल (दि.१३) दुपारी १२ वाजेच्या सुमारास सॉलीड कॅफे येथे अचानक भेट देवून पाहणी केली. यावेळी कॅफेमध्ये एका खाजगी जागेवर दोन तरुण व दोन तरुणीं आढळून आले. पोलिसांनी त्यांची चौकशी करून सोडुन दिले.
यावेळी झालेल्या चौकशीत या कॅफेमध्ये अधिकचे पैसे घेवून तरुण-तरुणींना आक्षेपार्ह व असभ्य कृत्य करण्याची मुभा दिली जात असल्याचे स्पष्ट झाले. याप्रकरणी शिरपूर शहर पोलीस ठाण्यात पोलीस कर्मचारी अतुल संजय निकम यांच्या फिर्यादीवरून कॅफे मालक राहुल सुरेश कोळी (२८) याच्याविरुध्द गुन्हा दाखल केला आहे.
