अमळनेर (प्रतिनिधी) शहरातील जुना सहकारी दवाखान्या समोर तरुणावर चाकूने वार करून रोकड लांबविल्याची घटना घडली आहे. याप्रकरणी अमळनेर पोलिस स्थानकात राजेश एकनाथ निकुम (रा. पारधीवाडा अमळनेर) याच्याविरुद्ध गुन्हा दाखल करण्यात आला आहे.
यासंदर्भात मितेश जितेंद्र कामदार (वय २५, रा. प्लॉट नं. ३२१५/५/१२ तांबोळी जिन परिसर अमळनेर) यांनी दिलेल्या फिर्यादीनुसार, दि. २५ मे २०२२ रोजी दुपारी १ वाजेच्या दरम्यान राजेश एकनाथ निकुम (रा. पारधीवाडा अमळनेर) याने मितेश हे जेवण करुन मोटारसायकलीने दुकानावर जात असतांना त्यांना थांबवण्याचा इशारा केला. तसेच राजेश निकुंभ याच्या हातात चाकू असल्याने मितेशने त्याच्या जवळ गाडी थांबविली. त्यानंतर राजेश बोलला की, ‘तुझ्या गळयातील सोन्याची चैन दे’ त्यावर मितेशने नकार दिला असता मितेशला मोटार सायकलीवरुन खाली ओढुन गळयावर कानावर व हाताचे मनगटावर चाकूने वार केले. तसेच मितेशच्या पॅन्टच्या मागील खिशातील ५०० रुपये दराच्या दोन नोटा काढुन घेतल्या. व मितेशसह लोकांना शिवीगाळ करीत चाकु हवेत भिरकवीत निघुन गेला. याप्रकरणी अमळनेर पोलिस स्थानकात राजेश निकुम याच्याविरुद्ध गुन्हा दाखल करण्यात आला असून पुढील तपास पोलीस उपनिरीक्षक अनिल भुसारे हे करीत आहेत.
