अमळनेर (प्रतिनिधी) :-महाराष्ट्र राज्याचे लोकनेते तथा दिवंगत उपमुख्यमंत्री व राष्ट्रवादी काँग्रेसचे राष्ट्रीय अध्यक्ष स्वर्गीय अजितदादा पवार यांच्या अस्थीकलशाचे काल मंगळवारी अत्यंत शोकाकुल वातावरणात पाडळसरे धरणावर माजी मंत्री तथा आमदार अनिल पाटील यांच्या हस्ते व शेकडो कार्यकर्त्यांच्या उपस्थितीत विसर्जित करण्यात आले.
ज्या पाडळसरे धरणावर अजितदादा दोन वर्षांपूर्वी पाहणीसाठी व धरणाला गती देण्यासाठी आले होते त्याच धरणावर आज दुर्भाग्याने दादांच्या अस्थीचे विसर्जन करावे लागत असल्याने याचे मोठे दुःख आहे,परंतु ज्या धरणावर हजारो शेतकरी बांधवांची प्रगती अवलंबून आहेत त्याच धरणाच्या कुशीत अजितदानानी कायमस्वरूपी हसत रहावं हीच परमेश्वर चरणी प्रार्थना आहे.अमळनेर तालुका असेल जळगाव जिल्हा असेल किंवा संपूर्ण महाराष्ट्र असेल विकास कामांच्या रूपाने दादांच्या स्मृती कायमस्वरूपी आठवणीत राहतील अशी भावना अनिल पाटील यांनी व्यक्त केली.
दरम्यान स्व.अजितदादा पवार यांचे अस्थिकलश काल दुपारी अमळनेर येथे दाखल झाल्यानंतर अस्थी कलश राष्ट्रवादी काँग्रेस पक्ष कार्यालयात कार्यकर्त्यांच्या दर्शनासाठी ठेवण्यात आला होता.यावेळी राष्ट्रवादी व महायुतीचे शेकडो कार्यकर्ते,पदाधिकारी व दादा प्रेमींनी दर्शन घेतले.त्यानंतर अस्थिकलश रथयात्रा पाडलसरे धरणाकडे मार्गस्थ झाली. आमदार अनिल पाटील यांनी ओपन जिप्सीत स्वतः हातात अस्थीकलश घेतला होता. अमळनेर येथून धार, मारवड, कळमसरे, पाडळसरे मार्गे यात्रा पाडळसरे धरण येथे पोहोचली.
वाटेत त्या नंतर प्रताप कॉलेजच्या प्रवेशद्वारावर तसेच धार येथे मारवड येथे सु.ही.मुंदडे हायस्कूलच्या प्रवेशद्वारावर विद्यार्थी व शिक्षकांनी दर्शन घेऊन श्रद्धांजली वाहण्यात आली. याशिवाय प्रत्येक गावात रथ यात्रा थांबूवुन ग्रामस्थांकडून श्रद्धांजली वाहत दर्शन घेण्यात आले. व शेवटी धरणावर आमदार अनिल पाटील यांच्या हस्ते अस्थि विसर्जन करण्यात आले.
याप्रसंगी जेष्ठ नेत्या प्रतिभा शिंदे, राष्ट्रवादीचे जिल्हाध्यक्ष संजय पवार, उमेश नेमाडे,माजी जि प सदस्य सौ जयश्री पाटील, रविंद्र नाना पाटील यासह शेकडो पदाधिकारी व कार्यकर्ते उपस्थित होते.
