पाळधी, ता. धरणगाव प्रतिनिधी -: एकीकडे दुष्काळाचे सावट आणि दुसरीकडे दिवाळीचा सण अशा परिस्थितीत पालकमंत्री गुलाबराव पाटील यांनी धरणगाव तालुक्यातील पोखरी येथील बंजारा तांड्यात ग्रामस्थांसोबत दिवाळी साजरी केली. कोणताही शासकीय थाट न करता त्यांनी बंजारा समाजातील माता-भगिनी, ज्येष्ठ नागरिक आणि चिमुकल्यांसोबत वेळ घालवला. ग्रामस्थांच्या पंगतीत बसून दिवाळी फराळाचा आस्वाद घेतला. त्यांच्या या आपुलकीच्या भेटीने तांड्यातील ग्रामस्थांचा आनंद द्विगुणित झाला.
पालकमंत्री गुलाबराव पाटील यांचे तांड्यात आगमन होताच पारंपरिक वेशभूषेतील महिलांनी औक्षण करून त्यांचे स्वागत केले. यावेळी महिला व पुरुषांनी बंजारा आणि पावरा गीतांवर पारंपरिक नृत्य सादर केले. यावेळी ग्रामस्थांनी दुष्काळामुळे शेतीचे झालेले नुकसान आणि आर्थिक अडचणी पालकमंत्र्यासमोर मांडल्या. शासनाने जाहीर केलेल्या पाच हजार रुपयांच्या अग्रीम मदतीव्यतिरिक्त आणखी आर्थिक मदत मिळावी, अशी अपेक्षा शेतकऱ्यांनी व्यक्त केली. त्यावर शासन शेतकऱ्यांच्या पाठीशी खंबीरपणे उभे असून, त्यांना नक्कीच मदत केली जाईल, अशी ग्वाही गुलाबराव पाटील यांनी दिली. यावेळी माजी जि.प. सदस्य प्रतापराव पाटील, सरपंच गोकुळ शिंदे, उपसरपंच नवल पारधी, ग्रा.पं. सदस्य महेंद्र पाटील, संतोष वंजारी, किसन राठोड, रामलाल चव्हाण, इंदल रतन चव्हाण, धनराज राठोड, गुलाब चव्हाण, पांडुरंग चव्हाण, हिरालाल चव्हाण, ताराचंद चव्हाण, गोविंदा सोनवणे यांच्यासह सेनेचे पदाधिकारी, कार्यकर्ते व ग्रामस्थ उपस्थित होते.
