जळगाव (प्रतिनिधी) शहरातील गोलाणी मार्केटसमोर असलेल्या वाघ चेंबरमध्ये मध्यरात्रीनंतर चोरट्यांनी अपार्टमेंटमधील चार कार्यालयसह एक मोबाईल दुकान चोरट्यांनी फोडले. मोबाईलच्या दुकानातून चोरट्यांनी महागडे आयफोन आणि सॅमसंग मोबाईल लंपास केले आहेत. दुकानातील सीसीटीव्ही कॅमेरे आणि डीव्हीआर देखील चोरटे सोबत घेऊन गेले आहेत.
गोलाणी मार्केटसमोर विनीत आहुजा यांच्या मालकीचे आय फोनवाला हे दुकान आहे. मंगळवारी रात्री नेहमीप्रमाणे ते दुकान बंद करून घरी गेले. सकाळी ११ वाजेच्या सुमारास ते दुकानावर आले असता दुकान उघडल्यानंतर दुकानात चोरी झाली असल्याचे त्यांच्या लक्षात आले. दुकानातील वरील मजल्याची लाकडी फळी कुणीतरी तोडलेली होती तर सामान अस्ताव्यस्त पडलेला होता.
रात्रीच्या सुमारास चोरट्यांनी वाघ चेंबर आपले लक्ष केले. अपार्टमेंटमधील जवळपास ४ कार्यालयाचा कडीकोंडा चोरट्यांनी तोडला आहे. सुदैवाने तिथून फारसे काही चोरी झालेले नाही. आय फोनवाला दुकानाच्या वरील मजल्यावरून चोरट्यांनी दुकानात प्रवेश केला. दुकानातील ६ हजार रुपये रोख, महागडे ६ आयफोन आणि २ सॅमसंग कंपनीचे महागडे मोबाईल चोरट्यांनी लंपास केले आहेत. चोरट्यांनी दुकानातील एक सीसीटीव्ही कॅमेरा आणि डीव्हीआर देखील चोरून नेला आहे.
