पाचोरा (प्रतिनिधी) तालुक्यातील सावखेडा शेतशिवारातील गांजाची शेती स्थानिक पोलिसांनी उधळून लावली आहे. यावेळी पोलिसांनी तब्बल ४६ लाखांची गांजाची २०० झाडे जप्त केला असून याप्रकरणी एकाविरुद्ध गुन्हा दाखल करण्यात आला आहे. पोलिसांनी बुधवारी रात्री ही कारवाई करण्यात आली.
सुभाष बाबूराव पाटील (५९) असे या अटक करण्यात आलेल्या आरोपीचे नाव आहे. सावखेडा ता. पाचोरा शिवारातील शेतात त्याने गांजाची लागवड केल्याची माहिती पोलिसांना मिळाली. पिंपळगाव हरेश्वर पोलिसांनी बुधवारी रात्री तिथे लागलीच छापा टाकला. त्यावेळी शेतात गांजाची २०० झाडे आढळून आली. याची किंमत ४६ लाख रुपये इतकी आहे. याबाबत सुभाष पाटील याच्याविरुद्ध पिंपळगाव हरेश्वर पोलिसात गुन्हा दाखल करण्यात आला आहे. अपर पोलिस अधीक्षक रमेश चोपडे, उपविभागीय पोलिस अधिकारी भारत काकडे यांच्या मार्गदर्शनाखाली सहायक पोलीस निरिक्षक महेंद्र वाघमारे यांच्या पथकाने ही कामगिरी बजावली. दरम्यान, एरंडोल तालुक्यातीलही याच महिन्याच्या सुरुवातील खडकीसिम शेतशिवारातील गांजाची शेती स्थानिक पोलिसांनी उधळून लावली होती. यावेळी पोलिसांनी तब्बल 61 लाख 25 हजार रुपये किमतीचा गांजा जप्त करत दोन जणांवर गुन्हा दाखल केला होता.
