सोलापूर (प्रतिनिधी) पहाटे उठल्यानंतर आवाज देऊनही प्रतिसाद न देणाऱ्या पतीची चादर उचकून बघितली असता पत्नीची चांगलाच थरकाप उडाला. पतीच्या पायाजवळ घोणस जातीचा विषारी सर्प बसलेला होता. तर पतीच्या तोंडातून फेस येत होता. ही भयावह घटना आचकदाणणी (ता. सांगोला) येथे घडली. शिवाजी भानुदास खरात (वय ४३) असे मयत शेतकऱ्याचे नाव आहे.
घराच्या ओट्यावर झोपलेल्या ४३ वर्षीय शेतकऱ्यास पायाच्या अंगठ्याजवळ विषारी सापाने दंश केल्यामुळे त्याचा झोपेत मृत्यू झाला. ही घटना बुधवार, दि. १२ जुलै रोजी पहाटे ४:३० वाजण्याच्या पूर्वी आचकदाणणी (ता. सांगोला) येथे घडली. शिवाजी भानुदास खरात (वय ४३) असे मयत शेतकऱ्याचे नाव आहे. याबाबत माणिक नामदेव खरात यांनी पोलिसात खबर दिली.
मयत शेतकरी शिवाजी खरात कुटुंबासमवेत जेवण करून मंगळवारी रात्री ९ च्या सुमारास घरासमोर ओट्यावर झोपले होते.
मध्यरात्रीच्या सुमारास विषारी घोणस जातीच्या सापाने त्यांना पायाच्या अंगठ्याजवळ दंश केला. दरम्यान पत्नी शोभा ह्या नेहमी प्रमाणे बुधवार, दि. १२ जुलै रोजी पहाटे ४:३० वाजण्याच्या पूर्वी जनावरांचे शेण-घाण काढण्यासाठी उठल्या. यावेळी त्यांनी पतीला आवाज देऊनही उठले नाहीत, म्हणून त्यांनी पतीला जागे करत असताना त्यांच्या तोंडातून फेस येत असल्याचे पाहिले.
शोभा यांनी अंगावरील चादर बाजूला काढली असता पतीच्या पायाजवळ घोणस साप बसलेला होता. भेदरलेल्या शोभा खरात यांनी शेजारील बालाजी कोळेकर, नागनाथ महानवर, आप्पा चव्हाण, शिवाजी चव्हाण यांना बोलावले. शिवाजी यांना खासगी वाहनाने तत्काळ उपचारासाठी सांगोला ग्रामीण रुग्णालयात दाखल केले. परंतू तोपर्यंत उशीर झालेला होता. डॉक्टरांनी त्यांचा उपचारापूर्वी मृत्यू झाल्याचे सांगितले.
