जळगाव (प्रतिनिधी) पोलिस ठाण्यात दिलेल्या तक्रारीवरून दाखल गुन्हा मागे घेण्यासाठी मैहरुनिसा शेख कय्युम शेख (वय ३०, रा. पिंप्राळा हुडको) या तरुणाच्या घरात घुसून ६ जणांनी महिलेसह कुटुंबीयास मारहाण केली. या वेळी घरातील साहित्याची तोडफोडही करण्यात आली. ही घटना मंगळवारी (१६ जुलै) पिंप्राळा हुडकोमध्ये घडली. या प्रकरणी शुक्रवारी १९ जुलै रोजी सायंकाळी ५ वाजता रामानंदनगर पोलीस ठाण्यात गुन्हा दाखल करण्यात आला आहे.
या संदर्भात अधिक माहिती अशी की, जळगाव शहरातील पिंप्राळा हुडको परिसरातील मैहरुनिसा शेख यांनी पोलिस ठाण्यात तक्रार दिलेली होती. ती तक्रार मागे घेण्याची मागणी त्याच परिसरातील काही जणांनी केली. त्यावरून सहा जणांनी १६ जुलै रोजी रात्री १० वाजता महिलेच्या घरात प्रवेश करून तिच्यासह घरातील सदस्यांना शिवीगाळ करीत मारहाण केली. यावेळी घरातील वापरातील साहित्याचीदेखील तोडफोड करण्यात आली.
याप्रकरणी शेख यांनी शुक्रवारी १९ जुलै रोजी सायंकाळी ५ वाजता रामानंदनगर पोलिस ठाण्यात फिर्याद दिली. त्यावरून मारहाण करणाऱ्या सहा जणांविरुद्ध गुन्हा दाखल करण्यात आला आहे. पुढील तपास पोउनि संजय चौधरी करीत आहेत.
