जळगाव (प्रतिनिधी) शिक्षिकेचा पाठलाग करून त्यानंतर रस्त्यावर दुचाकी आडवी करून शिक्षिकेच्या गळ्यातून ८० हजार रुपयांचे मंगळसूत्र लांबवल्याचा प्रकार उघडकीस आला आहे. ही खळबळजनक घटना शुक्रवारी रात्री ८ वाजता भगवाननगरातील किलबिल शाळेजवळ घडली.
शहरातील नवीन भगवाननगरात रोहिणी विजयकुमार नारखेडे (वय ३९) या आपल्या परिवारासह वास्तव्याला आहेत. त्या एका शाळेत शिक्षिका म्हणून नोकरीला आहेत. शुक्रवारी रात्री ८ वाजेच्या सुमारास रोहिणी नारखेडे या किलबिल शाळेजवळून पायी जात होत्या. त्याच वेळी अज्ञात दुचाकी त्यांचा हळुवार पाठलाग करत होती.
किलबिल शाळेजवळ गाडी वळविण्याच्या बहाण्याने भामट्यांनी दुचाकी नारखेडे यांच्या समोर आडवी लावली आणि क्षणात त्यांच्या गळ्यातील ८० हजारांची सोन्याची पोत जबरी हिसकावून पसार झाले. महिलेने आरडाओरड केली. मात्र, तोपर्यंत दोन्ही संशयित हे दुचाकीवरून पसार झाले होते. दरम्यान, महिलेने लागलीच रामानंदनगर पोलिस ठाण्यात तक्रार दिली. त्यानुसार दोन जणांविरोधात गुन्हा दाखल करण्यात आला आहे.
