जळगाव (प्रतिनिधी) काम आटोपून घरी परतणाऱ्या आडगाव येथील राजेश पाटील वय ३२ रा. आडगाव ता.यावल या तरूणाच्या दुचाकीला अज्ञात वाहनाने दिलेल्या धडकेत त्याचा जागीच मृत्यू झाल्याची दुदैवी घटना मंगळवारी रात्री ११ वाजता जळगाव तालुक्यातील ममुराबाद गावाजवळ घडली आहे. याप्रकरणी जळगाव तालुका पोलीस ठाण्यात अज्ञात वाहनचालकाविरोधात गुन्हा दाखल करण्यात आला आहे.
यावल तालुक्यातील आडगाव येथे राजेश पाटील हा तरूण आपल्या परिवारासह वास्तव्याला आहे. तो जळगावातील एका खासगी रुग्णालयातील पॅथोलॉजी लॅबमध्ये कामाला होता. मंगळवारी ८ ऑक्टोबर रोजी रात्री ११ वाजेच्या सुमारास काम संपवून राजेश हा आपल्या दुचाकीने घरी आडगावला जायला निघाला. जळगाव तालुक्यातील ममुराबाद गावाच्या पुढे यावलकडून जळगावकडे जाणाऱ्या एका अज्ञात वाहनाने राजेशच्या दुचाकीला धडक दिली. त्यात राजेशला गंभीर दुखापत झाली. त्यात राजेशचा जागीच मृत्यू झाला. ममुराबाद येथील काही तरुणांनी रस्त्याला कडेला पडलेल्या राजेशचा मृतदेह पाहिल्यानंतर याबाबतची माहिती पोलिसांना दिली. पोलिसांनी राजेशचा मृतदेह जिल्हा शासकीय वैद्यकीय महाविद्यालय व रुग्णालयात आला. तसेच मृतदेहाची ओळख पटल्यानंतर आडगाव येथील पुरुषोत्तम भालेराव या युवकाला अपघात झाल्याचे सांगितले. त्यानंतर रात्रीच राजेशच्या नातेवाईकांनी जिल्हा रुग्णालयात गर्दी केली. राजेशच्या पश्चात आई-वडिल, पत्नी, ८ वर्षाचा मुलगा, ५ महिन्यांची मुलगी, भाऊ असा परिवार आहे. याबाबत जळगाव तालुका पोलीस ठाण्यात अकस्मात मृत्यूची नोंद करण्यात आली.
