जळगाव (प्रतिनिधी) गेल्या चोवीस तासात जळगावच्या सुवर्ण नगरीत सोन्याच्या दरात पंधराशे रुपयांची वाढ झाल्याचं पाहायला मिळत आहे. जागतिक पातळीवर सोन्याच्या (Gold) मागणीत वाढ झाल्याने ही भाववाढ झाल्याचे बोलले जात आहे.
सोन्यामध्ये झालेल्या या दरवाढीच्या मागे आंतरराष्ट्रीय पातळीवर गुंतवणूकदारांनी सुरक्षित गुंतवणूक म्हणून सोन्यामध्ये मोठी गुंतवणूक करण्याकडे कल वाढवला आहे. यामुळे सोन्याच्या मागणीत वाढ झाली असल्याने त्याचा परिणाम म्हणून सोन्याच्या किमतीत वाढ झाली असल्याचं सोने व्यवसाय करणाऱ्यांनी म्हटलं आहे. सोन्याच्या दरात वाढ झाली असली तरी आगामी काळात ही वाढ अजूनही होण्याची चिन्हे आहे. सोबतच लगीनसराई समोर असल्याने अनेक ग्राहकांनी या वाढत्या दरातही सोने खरेदी करणे पसंत केल्याचं दिसून येत आहे.
मागील काळात ऐन दिवाळीत सोन्याच्या दरात घसरण झाल्याने ग्राहकांसाठी मोठी संधी निर्माण झाली होती. त्यावेळी शुद्ध सोन्याचे दर 51 हजार रुपयांपर्यंत खाली आले होते. त्यानंतर दोनशे-पाचशे रुपये कमी-अधिक होत हे भाव गेल्या महिनाभरापासून याच रेंजमध्ये असल्याचं पाहायला मिळालं होतं. मात्र गेल्या दोन दिवसाच्या काळात 51 हजार 500 रुपयांवरुन हे भाव 52 हजार 800 रुपयांवर जाऊन पोहोचले असल्याचं आज (14 नोव्हेंबर) पाहायला मिळालं आहे.
