जळगाव (प्रतिनिधी) आमदार किशोर पाटील यांनी माघार घेतल्यामुळे जिल्हा दूध संघावर बिनविरोध वर्णी लागलेल्या माजी आमदार दिलीप वाघ यांनी शनिवारी चक्क राष्ट्रवादीच्या नेत्यांसोबत पॅनलच्या प्रचारात उतरून त्यांना बिनविरोध करणाऱ्या भाजप- शिंदे गटाला जबर धक्का दिला आहे.
दूध संघ निवडणुकीत माघारीच्या दिवशी शिंदेसेनेचे आमदार किशोर पाटील यांनी उमेदवारी अर्ज मागे घेऊन त्यांचे प्रतिस्पर्धी उमेदवार दिलीप वाघ यांना बिनविरोध निवडून आणले. वाघ यांनीदेखील आपण भाजप- शिंदेसेनेच्या पॅनलमध्ये जात असल्याचे जाहीर केले होते. परंतू वाघ आपल्याच पॅनलचे असल्याचा दावा महाविकास आघाडीकडूनही केला जात होता. निवडणूक कार्यक्रम पूर्ववत जाहीर झाल्याने शनिवारी पुन्हा दूध संघाचा प्रचार सुरू झाला. या प्रचारात राष्ट्रवादीचे पॅनलचे आमदार एकनाथराव खडसे, आमदार अनिल पाटील, माजी मंत्री डॉ. सतीश पाटील, जिल्हा बँकेचे अध्यक्ष गुलाबराव देवकर, ॲड. रवींद्र पाटील हे पाचोरा तालुक्यात गेले होते. या वेळी माजी आमदार दिलीप वाघ हे राष्ट्रवादीच्या नेत्यांसोबत पॅनलचा प्रचार करताना दिसून आले. माजी आमदार वाघ यांना प्रचारात आणून राष्ट्रवादीने भाजप- शिंदेसेनेला जोरदार धक्का दिला आहे.
