जळगाव (प्रतिनिधी) शेअर मार्केटमध्ये गुंतवणूक करून त्यातून नफ्याचे अमिष दाखवत दादावाडी येथील दोन बहिणींची ६ लाख ५ हजार रुपयांमध्ये ऑनलाईन फसवणूक केल्याचा प्रकार समोर सुरुवातीला दोघींना १ लाख ५ हजार रुपयांचा नफा देऊन त्यांचा विश्वास संपादन केला, मात्र नंतर मोठी रक्कम उकळली. या प्रकरणी जळगाव सायबर पोलिस ठाण्यात फसवणूक करणाऱ्यांविरुद्ध गुन्हा दाखल करण्यात आला आहे.
जळगाव शहरातील दादावाडी परिसरातील गृहिणी असलेल्या महिलेसह तिच्या बहिणीशी आयुषी आणि सुभाष अग्रवाल असे नावे सांगणाऱ्या दोन जणांनी व्हाटस्ॲपद्वारे संपर्क साधून त्यांना एका ग्रुपमध्ये ॲड केले. त्यानंतर महिलेला एक लिंक पाठविली व त्याद्वारे एक ॲप डाऊनलोड करण्यास सांगितले. त्यानंतर महिलेला शेअर मार्केटमध्ये गुंतवणूक करण्यास सांगितले. दोघे बहिणींनी काही रक्कम गुंतविली व एकीला ३० हजार तर दुसरीला ७५ हजार रुपयांचा नफा देऊन त्यांचा विश्वास संपादन केला. त्यानंतर दोघींकडून एकूण ६ लाख ५ हजार रुपये ऑनलाईन पद्धतीने वेगवेगळ्या बँक खात्यांवर स्वीकारले. गुंतविलेली रक्कम व नफाही मिळत नसल्याने फसवणूक झाल्याचे लक्षात आले व त्यानंतर दादावाडी परिसरातील महिलेने रविवारी ६ ऑक्टोबर रोजी सायंकाळी ७ वाजता जळगाव सायबर पोलिस ठाण्यात फिर्याद दिली. त्यावरून चार अनोळखींविरुद्ध गुन्हा दाखल करण्यात आला आहे. पुढील तपास पो.नि. नीलेश गायकवाड करीत आहेत.
