जळगाव (प्रतिनिधी) – नगरदेवळा जाण्याकरीता बसमध्ये चढतांना गर्दीचा फायदा घेत सुवर्णा अजय भोसले (वय ५२, रा. कळवा, ता. जि. ठाणे) या विवाहितेच्या पर्समधून ४५ हजार रुपयांचे १५ ग्रॅमचे मणी मंगळसूत्र व कानातले सोन्याचे दागिने चोरट्यांनी चोरुन नेले. ही घटना दि. १८ जुलै रोजी दुपारी साडेचार वाजेच्या सुमारास नवीन बस स्थानकात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
खासगी नोकरी करणाऱ्या ठाणे येथील सुवर्णा भोसले या दि. १८ जुलै रोजी दुपारी त्यांचे पती व सासू यांच्यासोबत नगरदेवळा येथे जाण्यासाठी नवीन बस स्थानकात आल्या. चाळीसगाव बसमध्ये बसल्यानंतर त्यांना पर्सची चैन उघडलेली दिसून आली. त्यांनी पर्सची तपासणी केली असता,त्यांना त्यामध्ये ठेवलेले १० ग्रॅमचे मणी मंगळसूत्र व ५ ग्रॅमचे सोन्याचे कानातले दिसून आले नाही. त्यांनी बसमध्ये शोध घेतला, मात्र तरी देखील त्यांना दागिने मिळून आले नाही.
तब्येत खराब झाल्यामुळे दिली उशिरा तक्रार
पर्समधून दागिने चोरीस गेल्यामुळे सुवर्णा भोसले यांना आशक्तपणा जाणवू लागला. त्यानंतर त्या नगरदेवळा येथे निघून गेल्या. दरम्यान, दि. २० जुलै रोजी त्यांनी जिल्हापेठ पोलिसात धाव घेत तक्रार दिली. त्यानुसार अज्ञात चोरट्याविरुद्ध गुन्हा दाखल करण्यात आला आहे.
