जळगाव (प्रतिनिधी) मला वेगवेगळ्या चौकशीसह विविध प्रकरणामध्ये अडकवून त्यामध्ये व्यस्त ठेवून राजकीय जीवन संपवून टाकण्याचा यांचा अडकवण्याचा प्रयत्न आहे. त्यांना असे वाटते की, मला जेलमध्ये टाकल्यावर यांच्यासाठी रान मोकळे आहे, अशा शब्दात राष्ट्रवादी काँग्रेसचे ज्येष्ठ नेते आ.एकनाथ खडसे यांनी प्रत्यक्ष नाव न घेता, देवेंद्र फडणवीस आणि गिरीश महाजन यांच्यावर टीकास्त्र सोडले आहे. भोसरी जमीन गैरव्यवहारा संदर्भात सुरू असलेली चौकशी आता लाचलुचपत विभागाकडे देण्यात आली आहे, यावर एकनाथ खडसेंनी प्रतिक्रिया दिली आहे.
आतापर्यंत झालेल्या चौकशींमध्ये मी निर्दोष निघालो आहे. मात्र असे असतानाही पुन्हा वेगवेगळ्या चौकशांच्या माध्यमातून मला अडकवले जात आहे. आता कोणतीही चौकशी झाली तरी मला विश्वास आहे की या चौकशीमध्ये कुठलेही तथ्य नसेल. तरीही नव्याने शोधण्याचा प्रयत्न करून खोट्या आरोपाखाली अडकवण्याचा प्रयत्न झाला तर सांगता येत नाही. कितीही प्रकारच्या चौकशा केल्या तरी त्यातून निर्दोष सुटेल, असा दावा एकनाथ खडसेंनी केला आहे.
भोसरी जमीन गैरव्यवहारा संदर्भामध्ये परत ही चौकशी लाचलुचपत विभागाने करावी, असं मी आता ऐकलं आहे. भोसरीतील भूखंडाची चौकशी अनेक वेळा झाली आहे. झोटिंग समितीने चौकशी केली. पुण्याच्या लाचलुचपत विभागाचे चौकशी करून यामध्ये कुठलाही दोष नाही. कुठलाही भ्रष्टाचार नाही, कुठलीही अनियमितता नाही म्हणून हा एफआयआर रद्द करावा, या संदर्भामध्ये पुणे सत्र न्यायालयामध्ये त्यांनी क्लोजर रिपोर्ट दीड महिन्यापूर्वी दिला आहे. नाशिक लाचलुचपत विभागानेही या प्रकरणाची चौकशी करून या प्रकरणात कुठलेही तथ्य नाही, असा अहवाल दिला आहे. आता ईडीच्या माध्यमातून ही चौकशी सुरू आहे, असंही खडसे यांनी सागितलं.
उत्तर महाराष्ट्रात मी एकमेव नेता असा आहे की यांना राजकीय दृष्ट्या अडचणीचा असल्याने वेगवेगळ्या चौकशांच्या माध्यमातून मला नाउमेद करण्याचा प्रयत्न केला जात असल्याचे एकनाथ खडसे म्हणाले. नाव न घेता खडसे यांनी उपमुख्यमंत्री देवेंद्र फडणवीस आणि भाजप नेते गिरीश महाजन यांना उद्देशून हा आरोप केला आहे. यामुळे ईडी किंवा इतर चौकशीच्या माध्यमातून मला अडचणीत आणण्याचा, छळण्याचा प्रयत्न आहे. मला नाउमेद करण्याचा प्रयत्न आहे, असं खडसे यांनी सांगितलं. मात्र सगळ्या गोष्टींमध्ये कुठलेही तथ्य नाहीये आणि मी कोणतेही नियमबाह्य काम अथवा भ्रष्टाचार केलेला नाही, असं सांगत खडसेंनी आपल्यावरील आरोप फेटाळून लावले.