चोपडा (प्रतिनिधी) अमळनेर दौऱ्यावर आलेले विरोधी पक्षनेते अजितदादा पवार यांच्याशी कोळी समाज शिष्टमंडळाने भेट घेत आदिवासी कोळी समाजावर होत असलेल्या अन्यायाची माहिती देत निवेदन दिले. यावेळी अजित पवार यांनी कोळी समाजाला न्याय मिळवून देण्याचे आश्वासन दिले. तसेच येत्या अधिवेशनात हा प्रश्न मांडू आणि मुख्यमंत्री व आदिवासी विकास विभागाचे आयुक्त, सचिव यांचेसमवेत बैठक लावून देऊन चर्चा घडवून आणणार असल्याचे सांगितले.
शुक्रवारी प्रांत कार्यालयावर आदिवासी टोकरे कोळी जमातीचे बांधवांचे संविधानिक न्याय हक्क मागण्याकरिता शेकडोच्या संख्येने आंदोलन होते. मात्र प्रांताधिकारी हे शरदचंद्रजी पवार साहेब, अजितदादा पवार व जयंतराव पाटील यांचा दौरा असल्याकारणाने कार्यालयात हजर राहू शकले नव्हते. त्यामुळे आदिवासी टोकरे कोळी बांधवांच्या शिष्टमंडळाने अजितदादांची शिबिरात भेट घेतली व तेथेच आदिवासी टोकरे, महादेव, मल्हार कोळी जमातीतर्फे निवेदन देण्यात आले. त्यानंतर पवार यांनी प्रांतसाहेबांना बोलावून आदिवासी कोळी जमातीच्या जाती दाखल्याच्या विषयावर चर्चा करून योग्य ते सहकार्य करण्याच्या सूचना केल्या.
तसेच सदर विषय मुख्यमंत्री यांना कळवून आदिवासी विकास विभागाचे आयुक्त, सचिव यांचेसमवेत बैठक लावून देण्याचे आश्वासित करून येत्या जुलै महिन्यात होणाऱ्या अधिवेशनात विरोधी पक्षनेते म्हणून बाजू मांडणार असल्याची भूमिका स्पष्ट केली. ही चर्चा घडवून आणण्यासाठी माजी विधानसभा अध्यक्ष अरुणभाई गुजराथी, माजी आमदार कैलास बापू पाटील, चो.सा.का. अध्यक्ष चंद्रहासभाई गुजराथी, कृषी उ.बा. समिती संचालक घनश्याम आण्णा पाटील, अमळनेर तालुक्याचे आमदार अनिल भाईदास पाटील, ज्येष्ठ नेते सुनील पाटील, ज्येष्ठ नेते डी.पी.साळुंके सर, राष्ट्रवादी युवक काँग्रेस तालुकाध्यक्ष दीपक सोनवणे, ज्येष्ठ नेते तुकाराम पाटील, राजू भाटिया यांचे सहकार्य लाभले. आदिवासी टोकरे कोळी जमातीच्या वतीने अॕड.गणेश सोनवणे, शुभम सोनवणे, नामदेव येळवे यांच्या समवेत चोपडा व अमळनेर तालुक्यातील कोळी समाज बांधव मोठ्या संख्येने उपस्थित होते.
