साकळी ता.यावल (प्रतिनिधी) महाराष्ट्र समता शिक्षक परिषद यांच्यामार्फत दिला जाणारा यंदाचा सन-२०२०-२१ या वर्षाचा ‘आदर्श शिक्षक पुरस्कार ‘ परसाडे ता यावल येथील जि.प. प्राथमिक शाळेच्या आदर्श व उपक्रमशील शिक्षिका कल्पना देविदास माळी यांना घोषित झालेला आहे. त्या मूळ साकळी ता.यावल येथील रहिवाशी आहे.
उत्कृष्ट शैक्षणिक साहित्य निर्मिती करुन त्याचा अध्यापनात प्रभावी वापर करणे यात त्यांचा उत्तम असा हातखंडा आहे. त्यांनी या अगोदर यावल तालुक्यातून सलग तीन वर्षे विज्ञान प्रदर्शनात प्रथम क्रमांक पटकावला आहे. तसेच शाळेत विविध शैक्षणीक उपक्रम राबविल्यामुळे जिल्हा शिक्षण व प्रशिक्षण केंद्र (डाएट) ने त्यांच्या उपक्रमाची दखल घेऊन त्यांचे शैक्षणिक लेख ‘ प्रेरणा ‘ मासिकात प्रसिद्ध केलेला आहे. तसेच धडपडणारे शिक्षक आणि सफर पहिलीच्या वर्गाची इत्यादी पुस्तकातूनही त्यांचे लेख प्रसिद्ध झालेले आहे. शिक्षिका कल्पना माळी या साकळी येथील सेवानिवृत्त आदर्श शिक्षक वामन माळी (गुरुजी) तसेच शिरसाड जि.प.शाळेतील सेवानिवृत्त शिक्षिका विमल माळी यांच्या सून असून पांढरीवस्ती ता.यावल येथील जि.प.शाळेतील शिक्षक जगदिश माळी यांच्या पत्नी आहे. सदर पुरस्कार घोषित झाल्याबद्दल त्यांचे सर्वत्र कौतुक होत आहे.
