सोलापूर (वृत्तसंस्था) काँग्रेस नेते आणि कृषी राज्यमंत्री विश्वजीत कदम यांनी आमदार प्रणिती शिंदे यांच्या मंत्रिमंडळ प्रवेशाबाबत भाष्य केलं आहे. प्रणिती शिंदे लवकरच महाराष्ट्राच्या मंत्रिपदी विराजमान होणार असल्याचा दावा विश्वजीत कदम यांनी केलाय.
सोलापुरातील कॉंग्रेसच्या मेळाव्यात बोलताना विश्वजीत कदम यांनी आमदार प्रणिती शिंदे यांच्या मंत्रीमंडळ प्रवेशाबाबत भाष्य केले आणि शिंदे समर्थकांना आश्चर्याचा धक्का दिला. यावेळी बोलताना विश्वजीत कदम म्हणाले, आमदार प्रणिती शिंदे आमच्यासोबत मंत्रीमंडळात नाहीत याची खंत वाटते. मात्र कदाचित लवकरच प्रणिती शिंदे या राज्य मंत्रिमंडळात राज्यमंत्रीच नव्हे तर कॅबिनेट मंत्री होतील असे विधान त्यांनी केले.
विश्वजीत कदम यांच्या विधानाने उपस्थित शिंदे समर्थकांनी टाळ्यांच्या कडकडाटात त्यांच्या विधानाचे स्वागत केले. आमदार प्रणिती शिंदे यांना मोठा वारसा आहे, जनताही त्यांना निवडून देते, मात्र काँग्रेस पक्षाने त्यांना एकदाही मंत्री म्हणून काम करण्याची संधी दिली नाही. खरं तर विश्वजीत कदम सोलापुरात आढावा बैठकीसाठी आले होते. पण त्यांनी संघटनेतील कार्यकर्त्यांनाही चार्ज केल्याची चर्चा पाहायला मिळाली.
