लातूर (वृत्तसंस्था) उदगीर तालुक्यातील अनुपवाडी येथील दोन भावांचा येत्या गुरुवारी (दि.१८) एप्रिल रोजी विवाह आहे. छोटा भाऊ नवरदेव आपल्या चुलत भावासह दुचाकीवरून लग्नपत्रिका देण्यासाठी निघाला होता. उदगीर-लातूर रोडवरील लोहारा (ता. उदगीर) गावाजवळ समोरून येणाऱ्या एका कारच्या धडकेत दुचाकीवरील नवरदेवासह त्याच्या चुलतभावाचाही अपघाती मृत्यू झाल्याची दुर्दैवी घटना बुधवारी (दि. १०) दुपारी १२ वाजेच्या सुमारास घडली. आकाश धोंडिबा निलेवाड (वय २५), विशाल भिवा निलेवाड (वय २२) असे मयत युवकांची नावे आहेत.
तालुक्यातील अनुपवाडी येथील भिवा निलेवाड यांची दोन मुले मनोज व विशाल या दोघा भावांचा विवाह सोहळा येत्या बुधवारी (दि.१८) अनुपवाडी येथे होणार होता. या दोन्ही सख्ख्या भावांच्या विवाह सोहळ्याच्या लग्न पत्रिका वाटपासाठी बुधवारी (दि.१०) छोटा भाऊ नवरदेव विशाल भिवा निलेवाड (२२) हा त्याचा सख्खा चुलत भाऊ आकाश धोंडीबा निलेवाड (२५) यास सोबत घेऊन पल्सर दुचाकीवरून (एम एच २४ बी क्यू ५८५३) निघाले होते. उदगीर-लातूर रस्त्यावरील लोहारा गावाजवळील मराठवाडा दूध डेअरीसमोर डस्टर कारचालकाने (एम एच १२ एन ई ९१५३) समोरून जोराची धडक दिली. या धडकेत नवरदेव विशाल व त्याचा चुलत भाऊ आकाश हे दोघेजण जागीच ठार झाले.
या भावांचे मृतदेह उत्तरीय तपासणीसाठी उदगीरच्या शासकीय रुग्णालयात पाठवण्यात आले. दरम्यान, उदगीर ग्रामीण पोलिसांनी घटनास्थळी जाऊन घटनेचा पंचनामा केला आहे. या घटनेची माहिती अनुपवाडी गावात समजताच आठवडाभरावर लग्न असलेल्या लग्नघरावर शोककळा पसरली आहे. या दुर्दैवी घटनेतील नवरदेवासह चुलत भावाच्या अपघाती मृत्यूबद्दल हळहळ व्यक्त होत आहे
