चोपडा (प्रतिनिधी) येथील प्रणित नितीन पाटील या बालकाला राष्ट्रपती बाल शौर्य पुरस्कार जाहीर झाला आहे. घरात शिरलेल्या चोरट्यांसोबत प्रणीत मोठ्या हिंमतीने लढला होता. दरम्यान, पुढील महिन्यात या पुरस्काराचे वितरण होणार आहे.
चोपडा- शिरपूर जुन्या रोडलगत असलेल्या साईविहार अपार्टमेंटमध्ये ५ डिसेंबर २०१९ रोजी भरदिवसा तरुण- तरुणीने घरात प्रवेश करून मिरचीची पूड असलेला स्प्रे डोळ्यांत मारून लुटमारीचा प्रयत्न केला होता. यावेळी घरात असलेल्या महिलांनी या दोघांशी झटापट करून त्यांना पकडण्याचा प्रयत्न केला. त्याचवेळी १२ वर्षीय प्रणितने देखील चोरट्याचा पाय घट्ट पकडून ठेवले होते. तर दुसरीकडे घर काम करणाऱ्या एका महिलेने चोर- चोर आवाज दिल्याने अपार्टमेंटमधील रहिवासी जमा झाले. चोरटे दुचाकीवरून पळ काढत असतांना त्यांना पकडून नागरिकांनी चोप दिला होता. त्यामुळे प्रणितच्या या धाडसाचे कौतुक झाले आणि तत्कालीन पोलीस अधिकाऱ्यांनी बाल शौर्य पुरस्कारासाठी प्रस्ताव पाठवण्याचे सुचवले. त्यानुसार प्रस्ताव पाठवण्यात आला होता. त्यानुसार प्रणित पाटील यास आज राष्ट्रपती बाल शौर्य पुरस्कार जाहीर झाल्याची माहिती राज्यपाल यांच्या कार्यालयाकडून मिळाली आहे. राष्ट्रीय शौर्य पुरस्कार मिळाल्याबद्दल निवड समितीच्या अध्यक्षा गिता सिद्धार्था यांच्या स्वाक्षरीचे पत्र प्राप्त झाले आहे.
