धरणगाव, प्रतिनिधी : धरणगाव शहरातील प्रभाग क्रमांक ४ मधील विठ्ठल मंदिर परिसरात अनेक वर्षांपासून बंद असलेला हायमस्ट लाईट अखेर सुरू झाल्याने परिसर प्रकाशमय झाला आहे. नगरसेवक हाजी इब्राहिम शेख यांच्या सातत्यपूर्ण पाठपुराव्यामुळे विद्युत विभागाने तातडीने दुरुस्तीचे काम हाती घेत हायमस्ट कार्यान्वित केला. त्यामुळे परिसरातील नागरिकांनी समाधान व्यक्त करत नगरसेवक हाजी इब्राहिम शेख यांच्या तत्परतेचे कौतुक केले.
विठ्ठल मंदिर व सभागृहाचे बांधकाम सुरू असल्याने या परिसरात नागरिक तसेच भाविकांची मोठ्या प्रमाणात ये-जा सुरू असते. मात्र, हायमस्ट आणि काही स्ट्रीट लाईट बंद असल्याने रात्रीच्या वेळी संपूर्ण परिसर अंधारात राहत होता. त्यामुळे महिला, लहान मुले, ज्येष्ठ नागरिक तसेच मंदिरात येणाऱ्या भाविकांना मोठ्या अडचणींचा सामना करावा लागत होता. अनेक दिवसांपासून ही समस्या कायम असल्याने नागरिकांमध्ये नाराजीचे वातावरण होते.
नागरिकांची अडचण लक्षात घेऊन नगरसेवक हाजी इब्राहिम शेख यांनी नगर परिषदेचे विद्युत अभियंता राहुल एस. तळेले यांच्याशी संपर्क साधून बंद पडलेला हायमस्ट तातडीने दुरुस्त करून सुरू करण्याची मागणी केली. त्यांच्या पाठपुराव्याची दखल घेत विद्युत विभागाने तात्काळ कार्यवाही केली.
अभियंता राहुल एस. तळेले यांच्या सूचनेनुसार इलेक्ट्रिक विभागाचे कर्मचारी किशोर वाघ, रावसाहेब पाटील आणि संदीप सोनवणे यांनी घटनास्थळी पोहोचून आवश्यक तांत्रिक दुरुस्ती पूर्ण केली. त्यानंतर अनेक दिवसांपासून बंद असलेला हायमस्ट पुन्हा प्रकाशमान झाला.
यावेळी सोमवंशीय क्षत्रिय समाजाचे अध्यक्ष उदय सोळंके, सदस्य पुरुषोत्तम सुतारे, विलास बिचवे, गोलू चौधरी, प्रेम ठाकरे, शोएब रजा यांच्यासह स्थानिक नागरिक उपस्थित होते. हायमस्ट सुरू झाल्याने नागरिकांनी समाधान व्यक्त करत नगरसेवक हाजी इब्राहिम शेख तसेच विद्युत विभागातील अधिकारी व कर्मचाऱ्यांचे आभार मानले.
