चाळीसगाव (प्रतिनिधी) – चाळीसगाव शहराच्या विकासात महत्त्वपूर्ण टप्पा ठरणाऱ्या तब्बल ₹९० कोटींहून अधिक खर्चाच्या विविध प्रशासकीय इमारती व विकासकामांचे लोकार्पण आणि भूमिपूजन आज (दि. २७ जुलै) सायंकाळी ६ वाजता नवीन पंचायत समिती कार्यालय परिसरात पार पडणार आहे. या प्रकल्पांमुळे चाळीसगावचे प्रशासन अधिक आधुनिक, स्मार्ट आणि गतिमान होण्यास मदत होणार असून नागरिकांना विविध शासकीय सेवा अधिक सुलभपणे उपलब्ध होतील.
या कार्यक्रमाचे उद्घाटन राज्याचे जलसंपदा तथा आपत्ती व्यवस्थापन मंत्री ना. गिरीषभाऊ महाजन यांच्या हस्ते होणार असून, पाणीपुरवठा व स्वच्छता मंत्री तथा जळगाव जिल्ह्याचे पालकमंत्री ना. गुलाबराव पाटील अध्यक्षस्थानी राहणार आहेत.
स्थानिक आमदार मंगेशदादा चव्हाण यांच्या पाठपुराव्यातून साकार होत असलेल्या या विकासकामांमध्ये नवीन पंचायत समिती इमारत (₹८.५ कोटी), उपप्रादेशिक परिवहन कार्यालय (₹२६ कोटी), व्हीव्हीआयपी शासकीय विश्रामगृह (₹९.३९ कोटी), नवीन टाकळी प्रकल्पाची पाणीपुरवठा योजना (₹२१.३२ कोटी), प्रांताधिकारी व तहसीलदार निवासस्थाने (₹६.४० कोटी), उपनिबंधक कार्यालय (₹१.६५ कोटी), सार्वजनिक बांधकाम विभाग कर्मचारी निवासस्थाने (₹३.६३ कोटी) तसेच ग्रामीण रुग्णालय कर्मचारी निवासस्थाने (₹१३.२३ कोटी) अशा विविध महत्त्वाच्या प्रकल्पांचा समावेश आहे.
या प्रकल्पांमुळे प्रशासकीय यंत्रणा अधिक सक्षम होण्याबरोबरच नागरिकांना एकाच ठिकाणी आधुनिक सुविधा उपलब्ध होणार असून, चाळीसगावच्या सर्वांगीण विकासाला नवी दिशा मिळणार असल्याची भावना व्यक्त होत आहे.
या लोकार्पण व भूमिपूजन सोहळ्यास नागरिकांनी मोठ्या संख्येने उपस्थित राहावे, असे आवाहन भारतीय जनता पक्ष चाळीसगाव शहर, सायगाव, मेहूणबारे व वाघळी मंडळाच्या वतीने करण्यात आले आहे.
