जळगाव (प्रतिनिधी) गेल्या काही दिवसांपूर्वी एमआयएमचे खासदार इम्तियाज जलील यांनी महाविकास आघाडी सरकारमध्ये सामील होण्यासाठी राष्ट्रवादीला (NCP) युतीची ऑफर दिल्यामुळे महाराष्ट्रात एकच गोंधळ निर्माण झाला. या विषयावरुन राज्याचे मुख्यमंत्री उद्धव ठाकरे आणि राष्ट्रवादी कॉंग्रेसचे अध्यक्ष शरद पवार यांच्याबद्दल फेसबुकवर अत्यंत अश्लिल पोस्ट शेअर करणाऱ्या एका व्यक्तीला शिवसैनिकांनी भर चौकात चांगलाच धुतला आहे. दरम्यान या घटनेचा व्हिडीओ (Video) सोशल मीडियावर व्हायरल झाला आहे.
एमआयएम आणि राष्ट्रवादी युतीच्या चर्चेवरून भाजपने शिवसेनेच्या हिंदुत्वावर प्रश्न उपस्थितीत करत निशाणा साधला होता. राज्यात वेगवेगळी चर्चा रंगली. मात्र, शिवसेना आणि राष्ट्रवादीने एमआयएमची ऑफर साफ धुडकावून लावली होती. पण, जळगाव जिल्ह्यातील यावल तालुक्यात राहणाऱ्या एका व्यक्तीने मुख्यमंत्री उद्धव ठाकरे आणि शरद पवार यांच्याबद्दल आक्षेपार्ह पोस्ट फेसबुकवर शेअर केली होती.
या पोस्टमुळे शिवसैनिक कमालीचे संतापले होते. त्यांनी या व्यक्तीचे घर गाठले आणि त्याला चौकात घेऊन आले. त्यानंतर संतापलेल्या शिवसैनिकांनी या व्यक्तीला बेदम चोप दिला. शिवसैनिकांचे रौद्ररुप पाहून या व्यक्तीने हात जोडून माफी मागितली. यापुढे अशी पोस्ट टाकणार नाही, अशी ग्वाही दिली. त्यानंतर शिवसैनिकांनी चोप दिल्यानंतर माफी मागून प्रकरण मिटवले. या घटनेचा व्हिडीओ सोशल मीडियावर व्हायरल झाला आहे.
