जळगाव (प्रतिनिधी) शहरातील तुकारामवाडी परिसरात एका वृद्धाने गळफास घेऊन आत्महत्या केल्याचा प्रकार रविवारी उघडकीस आला. ज्ञानेश्वर जगन्नाथ महाजन (वय ६१) असे आत्महत्या केलेल्या वृद्धाचे नाव आहे.
तुकारामवाडी परिसरातील रहिवाशी ज्ञानेश्वर महाजन हे हातमजुरी करत होते. त्यांची पत्नी व मुलं दुसरीकडे राहतात. ज्ञानेश्वर महाजन यांच्या शेजाऱ्यांना त्यांच्या खोलीतून रविवारी दुर्गंधी यायला लागली. तशातच दोन दिवसांपासून ज्ञानेश्वर महाजन यांचा दरवाजा बंद असल्यामुळे शेजारच्यांना शंका आली. त्यामुळे शेजारच्यांनी दरवाजा उघडून बघितले असता ज्ञानेश्वर महाजन हे गळफास घेतलेल्या अवस्थेत आढळून आले. परिसरातील नागरिकांनी तात्काळ एमआयडीसी पोलिसांना माहिती दिली. याप्रकरणी जिल्हा रुग्णालयातील वैद्यकीय अधिकारी डॉ प्रवीण पाटील यांच्या खबरीवरून एमआयडीसी पोलिस ठाण्यात अकस्मात मृत्यूची नोंद करण्यात आली आहे. तर माहिती मिळाल्यानंतर एमआयडीसी पोलिस ठाण्याचे सहायक पोलिस निरीक्षक अमोल मोरे , हेडकॉन्स्टेबल रतीलाल पवार, पोलिस कॉन्स्टेबल साईनाथ मुंडे यांनी घटनास्थळी भेट देत पंचनामा केला होता.
