चाळीसगाव (प्रतिनिधी)— चाळीसगाव येथे अतिरिक्त जिल्हा व सत्र न्यायालयासाठी जागा उपलब्ध करून देणे तसेच इमारतीसाठी निधी मंजूर करण्यात मोलाची भूमिका बजावल्याबद्दल मा. नामदार गिरीशभाऊ महाजन यांचा चाळीसगाव वकील संघाच्या वतीने सत्कार करण्यात आला. या कार्यक्रमास वकील संघाचे पदाधिकारी, जेष्ठ विधिज्ञ तसेच सर्व सदस्य मोठ्या संख्येने उपस्थित होते.
कार्यक्रमादरम्यान जेष्ठ विधिज्ञ साहेबराव पाटील तसेच वकील संघाचे अध्यक्ष ॲड. धीरज पवार यांनी मनोगत व्यक्त करत ना. गिरीशभाऊ महाजन आणि आमदार मंगेशदादा चव्हाण यांचे आभार मानले. चाळीसगावच्या अनेक वर्षांपासून प्रलंबित असलेल्या न्यायालयाच्या मागणीला अखेर यश मिळाल्याचा आनंद त्यांनी व्यक्त केला.
यावेळी वकील संघाकडून चाळीसगावमध्ये अपर जिल्हाधिकारी कार्यालय स्थापन करण्याची मागणी देखील करण्यात आली. ही मागणी रास्त असल्याचे मान्य करत ती पूर्ण करण्याचे आश्वासन ना. गिरीशभाऊ महाजन यांनी दिले. तसेच अतिरिक्त जिल्हा व सत्र न्यायालयाच्या इमारतीचे भूमिपूजन लवकरच करण्यात येणार असून पुढील दोन वर्षांत भव्य इमारत उभी राहील, असा विश्वासही त्यांनी व्यक्त केला.
या प्रसंगी आमदार मंगेशदादा चव्हाण यांनी अतिरिक्त जिल्हा व सत्र न्यायालयासाठी जागा उपलब्ध करून घेणे व निधी मंजुरीपर्यंतचा संपूर्ण प्रवास सविस्तर मांडला. या प्रकल्पासाठी सातत्याने पाठपुरावा करून मंजुरी मिळवण्यात आली असल्याचे त्यांनी स्पष्ट केले.
कार्यक्रमाचे प्रास्ताविक व सूत्रसंचालन ॲड. रणजीत पाटील यांनी केले. वकील संघाची मागील ४२ वर्षांची मागणी पूर्णत्वास आल्याबद्दल त्यांनी समाधान व्यक्त केले.
दरम्यान, अलीकडेच माजी खासदार उन्मेष पाटील यांनी बिलाखेड शिवारातील न्यायालयाच्या जागेबाबत बेकायदेशीरतेचा आरोप करत शंका उपस्थित केली होती. या पार्श्वभूमीवर वकील संघाने तीव्र प्रतिक्रिया देत अशा वक्तव्यांमुळे जनतेमध्ये संभ्रम निर्माण होत असल्याचा आरोप केला. न्यायालयासारख्या विकासात्मक प्रकल्पाला विरोध करून अडथळे निर्माण करण्याचा प्रयत्न होत असल्याचा निषेध वकील संघाने व्यक्त केला.
