जळगाव, (प्रतिनिधी) – तरुणाईला अमली पदार्थांच्या विळख्यातून मुक्त करून सुरक्षित भविष्य घडविण्याच्या उद्देशाने वैशाली फाउंडेशन आणि जळगाव जिल्हा पोलीस दल यांच्या संयुक्त विद्यमाने आयोजित ‘नशामुक्त जळगाव जिल्हा’ अभियानाला उत्स्फूर्त प्रतिसाद मिळाला. छत्रपती संभाजी राजे नाट्यगृह, महाबळ रोड येथे आयोजित या कार्यक्रमाला तरुणाई, पालक, शिक्षक आणि नागरिकांनी मोठ्या संख्येने उपस्थिती लावली.
मुख्यमंत्री देवेंद्र फडणवीस यांनी २०२९ पर्यंत महाराष्ट्र नशामुक्त करण्याचे ध्येय ठेवले असून, या अभियानाच्या माध्यमातून जळगाव जिल्ह्यातून या संकल्पनेला बळ मिळत असल्याचा आनंद जलसंपदामंत्री गिरीश महाजन यांनी व्यक्त केला. व्यसनमुक्त तरुणाई ही सुरक्षित कुटुंब, सक्षम समाज आणि उज्ज्वल महाराष्ट्राची गुरुकिल्ली असल्याचा संदेश या उपक्रमातून देण्यात आला.
कार्यक्रमाला राज्याचे जलसंपदामंत्री गिरीश महाजन, पालकमंत्री तथा पाणीपुरवठामंत्री गुलाबराव पाटील, आदिवासी विकासमंत्री अशोक उईके, आमदार मंगेश चव्हाण, आमदार राजूमामा भोळे, आमदार नंदकिशोर महाजन, महापौर दीपमाला काळे, उपमहापौर मनोज चौधरी, जिल्हाधिकारी रोहन घुगे, जिल्हा पोलीस अधीक्षक श्रीकांत ढिवरे, जिल्हा परिषदेच्या मुख्य कार्यकारी अधिकारी करिष्मा नायर, मनपा आयुक्त आदित्य जीवने यांच्यासह विविध क्षेत्रांतील मान्यवर उपस्थित होते.
तसेच नगरसेविका उज्वलाताई बेंडाळे, वंदनाताई इंगळे, प्रतीक्षा सोनवणे, जयश्रीताई पाटील, शैलाताई चौधरी, माजी नगरसेवक अजय राम जाधव, नगरसेवक नितीन बरडे, अमर जैन, नरेंद्र पाटील, विरेन खडके, अमित काळे, अजित राणे, राहुल वाघ, गणेश सोनवणे, विजय वानखेडे यांच्यासह अनेक लोकप्रतिनिधी, सामाजिक कार्यकर्ते आणि नागरिक सहभागी झाले.
वैशाली फाउंडेशनचा सामाजिक पुढाकार
वैशाली फाउंडेशनच्या अध्यक्षा तथा जळगाव शहर महानगरपालिकेच्या नगरसेविका वैशाली अमित पाटील यांच्या पुढाकाराने आणि जिल्हा पोलीस दलाच्या सहकार्याने या अभियानाचे आयोजन करण्यात आले. अमली पदार्थांचे दुष्परिणाम रोखणे, तरुणाईमध्ये जनजागृती निर्माण करणे आणि व्यसनमुक्त समाज घडविण्यासाठी नागरिकांनी एकत्र येण्याचे आवाहन यावेळी करण्यात आले.
नशामुक्ती ही केवळ पोलीस यंत्रणा किंवा एखाद्या सामाजिक संस्थेची जबाबदारी नसून पालक, शिक्षक आणि समाजातील प्रत्येक नागरिकाचे सामूहिक कर्तव्य आहे. तरुणाईला व्यसनांपासून दूर ठेवण्यासाठी कुटुंब, शैक्षणिक संस्था आणि प्रशासनाने समन्वयाने काम करण्याची गरज या अभियानातून अधोरेखित करण्यात आली.
कार्यकर्त्यांच्या मेहनतीने उपक्रम यशस्वी
कार्यक्रम यशस्वी करण्यासाठी वैशाली फाउंडेशनचे स्वप्निल शेळके, गजानन इंगळे, रोहन सोनवणे, सुनील जंगले, गणेश निंबाळकर, सौरभ पाटील, सागर सोनवणे, विवेक जगदाळे, राहुल जोशी, गौरव वाणी, आशिष पाटील, आदित्य पाटील, ध्रुवेष पाटील, निखिल पाटील यांच्यासह अनेक कार्यकर्त्यांनी परिश्रम घेतले.
‘नशामुक्त जळगाव जिल्हा — सुरक्षित तरुणाई, सशक्त महाराष्ट्र’ हा संदेश देत व्यसनमुक्त समाजनिर्मितीसाठी सर्वांनी एकत्र येण्याचे आवाहन वैशाली अमित पाटील यांनी केले.
