बोदवड (प्रतिनिधी) तालुक्यातील हिंगणे येथील जुगार अड्ड्यावर धाड टाकली म्हणून गैरकायद्याची मंडळी जमवून पोलिसाला धक्काबुक्की व दमबाजी करुन मोबाईल लांबविल्याची खळबळजनक घटना घडली आहे. याप्रकरणी बोदवड पोलीस स्थानकात दहा जणांविरुद्ध गुन्हा दाखल करण्यात आला असून आठ संशयित आरोपींना अटक करण्यात आली आहे.
या संदर्भात पो.ना. सचिन मधुकर चौधरी यांनी दिलेल्या फिर्यादीनुसार, दि. ३ मे २०२२ रोजी सचिन चौधरी व पो.कॉ. निखिल नारखेडे अशा दोघं पोलीस कर्मचाऱ्यांनी हिंगणे येथे जुगार अड्ड्यावर धाड टाकली. यावेळी राजू सिताराम सोनवणे, भागवत काशिनाथ पाटील (वय ३८), मोहन छगन पाटील (वय २५), श्याम नंदलाल पठ्ठे, एकनाथ काशिनाथ होडगरे, ईश्वर समाधान पाटील, दादाराव गुलाब पाटील, प्रकाश रामा वराडे, संदीप समाधान पवार, मोहन पंडित होडगरे (सर्व रा. हिंगणे ता. बोदवड) या सर्वाना जुगाराची रेड केल्यानंतर पोलीस स्टेशनला येण्यास सांगितले. परंतू याचा राग आल्याने संबंधितांनी गैरकायद्याची मंडळी जमवून पो.ना. सचिन चौधरी व साक्षीदार पो.कॉ. निखिल नारखेडे अशा दोघांना धक्काबुक्की व शिवीगाळ करुन त्यांच्यावर हल्ला केला.
तर भागवत पाटील याने पो.ना. सचिन चौधरी यांची मोबाईलमध्ये शुटींग करुन आता तुम्हाला दाखवतोच, तुमची नोकरीच खातो, तुम्ही मला काय समजता? अशी दमबाजी केली. तसेच पो.ना. चौधरी यांच्या वरच्या खिशातील OPPO कंपनीचा निळ्या रंगाचा १२ हजाराचा किंमतीचा मोबाईल फोन बळजबरीने हिसकावुन, गर्दीचा फायदा घेत पळून गेला. तसेच शासकीय कामात अडथळा आणला. याप्रकरणी बोदवड पोलीस स्थानकात दहा जणांविरुद्ध गुन्हा दाखल करण्यात आला असून आठ संशयित आरोपींना अटक करण्यात आली असून पुढील तपास स.पो.नि. अंकुश जाधव हे करीत आहेत. दरम्यान, या घटनेमुळे तालुक्यात प्रचंड खळबळ उडाली आहे.
