बोदवड (प्रतिनिधी) होळीच्या निमित्ताने बोदवड शहरातील नगरसेवकांनी राजकीय परिवर्तनाचे रंग दाखवले आहेत. 13 मार्च रोजी शिवसेनेत प्रवेश करणाऱ्या नगरसेवकांच्या वतीने, 14 मार्च रोजी तीन नगरसेवक भाजपमध्ये दाखल झाले आहेत, ज्यामुळे आ. एकनाथ खडसेंना जोरदार धक्का बसला आहे.
नगरसेवक हकीम बागवान, नगरसेवक मुजम्मील शाह, नगरसेविका एकताबी लतीफ शेख यांच्या वतीने त्यांचे पती लतीफ शेख यांनी महाराष्ट्र राज्याचे उपमुख्यमंत्री एकनाथ शिंदे यांच्या कार्यावर प्रभावित होऊन, आमदार चंद्रकांत पाटील यांच्या नेतृत्वावर विश्वास ठेवत मुंबई येथील उपमुख्यमंत्री एकनाथ शिंदे यांच्या उपस्थितीत मुक्तागिरी बंगल्यावर जाहीर प्रवेश केला.
राष्ट्रवादी काँग्रेस पार्टीच्या (शरद पवार गट) काही नगरसेवकांच्या शिवसेनेत जाण्याच्या चर्चांनंतर, आ. एकनाथ खडसेंच्या विश्वासू सहकारी नगरसेवकांचा शिवसेनेत व भाजपमध्ये प्रवेश झाल्याने राष्ट्रवादी काँग्रेसला (शरद पवार गट) मोठा धक्का बसला आहे.
दुसरीकडे, 13 मार्च रोजी आ. एकनाथ खडसेंचा बोदवड दौरा पार पडलेला असतांना, त्याचवेळी नगरसेवकांचा शिवसेनेत आणि भाजपमध्ये झालेला प्रवेश हा एक मोठा धक्का ठरला आहे.
याप्रसंगी नगराध्यक्ष आनंदा पाटिल, उपनगराध्यक्ष संजय गायकवाड, नगरसेवक दिनेश माळी, नगरसेवक सुनिल बोरसे, नगरसेवक निलेश माळी, नगरसेवक प्रितेश जैन, नगरसेवक हर्षल बडगुजर, शिवसैनिक अमोल व्यवहारे यांच्यासह अनेक कार्यकर्ते उपस्थित होते.
काल झालेल्या प्रवेशानंतर, आज जामनेर येथे जलसंपदामंत्री गिरीश महाजन यांच्या हस्ते व भाजप अध्यक्ष मधुकर राणे यांच्या प्रमुख उपस्थितीत, बोदवड येथील नगरसेवक कडूसिंग उर्फ भरत पाटील, सौ योगिता ताई खेवलकर, सौ पूजा ताई पारधी, माजी स्वीकृत नगरसेवक डॉ. सुधीर पाटील, काँग्रेस महिला तालुका अध्यक्ष उषाताई पाटील आणि इतर पदाधिकारी यांचा भाजप प्रवेश जामनेर येथे पार पडला. या वेळी जिल्हा चिटणीस परमेश्वर टिकारे, तालुका उपाध्यक्ष विक्रम पाटील, शहर अध्यक्ष पवन जैन, तालुका सरचिटणी पंकज डिके यांची उपस्थिती होती.
