जळगाव (प्रतिनिधी) – जळगाव जिल्हा मध्यवर्ती सहकारी बँकेच्या (जेडीसीसी) पंचवार्षिक निवडणुकीचा बिगुल वाजताच राजकीय हालचालींना वेग आला आहे. उमेदवारी अर्ज विक्रीच्या पहिल्याच दिवशी तब्बल ९४ इच्छुकांनी ३१४ अर्जाची खरेदी केल्याने निवडणुकीतील चुरस स्पष्ट झाली आहे.
केंद्रीयमंत्री रक्षा खडसे, वस्त्रोद्योग मंत्री संजय सावकारे, माजी मंत्री डॉ. सतीश पाटील, माजीमंत्री एकनाथ खडसे यांचे स्वीय सहायक योगेश कोलते, तसेच बँकेचे चेअरमन संजय पवार यांच्या पत्नी सोनल पवार, मंत्री संजय सावकारे यांच्या पत्नी रजनी सावकारे, गोंडू महाजन, जनाबाई महाजन, मधुकर राणे यांचा समावेश आहे. बँकेचे चेअरमन संजय पवार यांच्या पत्नी सोनल पवार यांनीही अर्ज घेतल्याने निवडणुकीतील संभाव्य समीकरणांविषयी उत्सुकता वाढली आहे. दरम्यान, विद्यमान संचालक विनोद पाटील (यावल) यांनी पहिल्याच दिवशी उमेदवारी अर्ज दाखल केला. जिल्हा बँकेच्या सत्तेच्या चाव्या आपल्या हाती ठेवण्यासाठी विविध राजकीय गटांनी मोर्चेबांधणी सुरू केली आहे.विविध राजकीय गटांनी मोर्चेबांधणी सुरू केली आहे. उमेदवारी अर्ज दाखल करण्याची अंतिम मुदत ३० ऑक्टोबर असल्याने इच्छुकांना अर्ज भरण्यासाठी अवघे चार दिवस मिळणार आहेत. त्यामुळे उमेदवारी निश्चित करणे, समर्थकांची जुळवाजुळव करणे आणि राजकीय समीकरणे जुळविण्यासाठी इच्छुकांची धावपळ उडणार आहे. महायुती आणि महाविकास आघाडीतील संभाव्य उमेदवारांसाठी हे दिवस निर्णायक ठरण्याची शक्यता आहे.
निवडणुकीत चुरशीचे संकेत
पहिल्याच दिवशी झालेल्या अर्ज विक्रीला मिळालेला प्रतिसाद पाहता जिल्हा बँकेच्या निवडणुकीत मोठी चुरस निर्माण होण्याचे संकेत मिळत आहेत. आता कोणाला अधिकृत उमेदवारी मिळते, कोण माघार घेते आणि कोणती राजकीय समीकरणे आकाराला येतात, याकडे संपूर्ण जिल्ह्याचे लक्ष लागले आहे.
