वॉशिंग्टन (वृत्तसंस्था) किडनी प्रत्यारोपणासाठी डॉक्टरांनी आता एक क्रांतिकारी पद्धत शोधली आहे. अमेरिकेत, जगात प्रथमच मानवी शरीरात डुक्कराची किडनी प्रत्यारोपण शस्त्रक्रिया करण्यात आली आहे. ही शस्त्रक्रिया न्यूयॉर्क शहरातील एनवाययू लँगोन हेल्थ मेडिकल सेंटरमधील डॉक्टरांनी केली आहे. प्रत्यारोपणानंतर, डुक्कराची किडनी रुग्णाच्या शरीरात योग्यरित्या कार्य करत असल्याचंही समोर आलं आहे.
किडनी प्रत्यारोपणाची पूर्ण प्रक्रिया न्यूयॉर्क सिटीमध्ये एनवाययू लॅगन हेल्थ सेंटरमध्ये करण्यात आली. डॉक्टर म्हणाले की, प्रत्यारोपणा आधी डुकराचे जीन बदलण्यात आले होते. जेणेकरून मानवी शरीराने त्याचा अवयव लगेच नाकारू नये. असं पहिल्यांदाच झालं आहे की मानवी शरीरात एखाद्या दुसऱ्या प्राण्याच्या किडनीचं यशस्वी प्रत्यारोपण करण्यात आलं. याआधीही अनेक प्रकारचे परिक्षण झाले आहेत. पण प्रत्येकवेळी प्रत्यारोपण अपयशी ठरत होतं. मात्र, पहिल्यांदाच डुकराची किडनी मानवी शरीराने यशस्वीपणे स्वीकारली.
मीडिया रिपोर्टनुसार, प्रत्यारोपणाची ही प्रक्रिया एक ब्रेन डेड झालेल्या रुग्णांवर करण्यात आली. रुग्णांच्या किडनीने काम करणं बंद केलं होतं. पण त्याला लाइफ सपोर्टवरून हटवण्याआधी डॉक्टरांनी त्याच्या परिवाराकडे या टेस्टची परवानगी मागितली होती. त्यानंतर हा प्रयोग करण्यात आला. तीन दिवसांपर्यंत डुकराची किडनी ब्रेन डेड रूग्णाच्या रक्त वाहिन्यांसोबत जुळलेली किडनी शरीराच्या बाहेरच ठेवण्यात आली होती.
